SKILNINGSTRÉNU VEX ÁSMEGIN.

Málsvörn Íslands gegn icesaveáþjáninni er hafin á erlendri grund.  Orð utanríkisráðherra um að unnið hafi verið jafnt og þétt að þessum málum kitla hláturtaugarnar.  Miðað við árangur hlýtur Össur að fagna mjög liðsinni forsetans sem á einum degi opnaði upp á gátt alla umræðu.  Annar sterkur landvari er Eva Joly sem talar sannlega ekki tungum tveim.  En umheimurinn sem átti að hverfa okkur sjónum með synjun forsetans er þess í stað kominn inn á gafll og jafnvel tilbúinn að sleikja á okkur sárin.  Þráfaldlegar yfirlýsingar stjórnarflokkanna um að lengra verði ekki komist með icesave virðist vera að snúast upp í andstöðu sína.  Sú einarða afstaða ríkisstjórnarflokkanna að þjóðin verði að axla útrásarævintýrið hefur fært brennidepilinn frá hinum einu og sönnu sökudólgum.  Engum hugnast að sækja þá heim og eiga þó einhverjir athvarf í stórborgum landanna sem að okkar sækja.  Stjórnmálamenn bera líka sína krossa.  Skálkasjól sökudólganna er regluverk EES um innistæðutryggingar, ónýtt regluverk sem vonlaust væri að framfylgja nema í tilviki smáþjóða eins og Íslands.   Með synjun sinni á icesavelögunum er Ólafur Ragnar að líkum að færa þjóðinni nýjan samningsgrundvöll um icesave, nýja ímynd og ný viðskiptatækifæri.  Ríkisstjórnin ætti að huga að þessu áðuren hún fer að spyrða eigið líf við útkomu þjóðaratkvæðagreiðslunnar,  það er eitthvað svo innilega 2007.

LÁ        

Athugasemdir

[Þorður Sævar Jonsson (IP-tala skráð) 8.1.2010 kl. 04:12]

Frábært blogg Lýður minn!!!

Ég hef sagt það.  Og segi það enn... Að synjun Ólafs verður skráður einn merkasti viðburður Islandssögurnar.  Núna er það okkar að safna liði og hreinsa. Jafnvel að nota aðferðir Kára Sölmundarsonar.....Við getum svosem sleppt því..... Það er ekki okkar að hefna.....En nýja og heiðarlega sópa í Alþingishúsið, það er málið.

[Ragnar Gunnlaugsson, 8.1.2010 kl. 14:04]

Nú líkar mér við ykkur strákar.

[Pétur Harðarson, 9.1.2010 kl. 02:25]

Það er gott að sjá umræðurnar um þetta mál snúast frá því sem þær voru eftir tilkynningu forsetans.  Núna verðum við að einbeita okkur að styrkja samningstöðu okkar enn frekar og fella svo samninginn í atkvæðagreiðslunni.  Ríkisstjórnin verður að bíða með sjálfsmorðstilraunir þangað til eftir atkvæðagreiðslu eða segja af sér STRAX. 

Persónulega er ég ekki viss um að það sé gott fyrir okkur að fara í kosningar á næstunni þó það myndi kannski ekki breyta miklu þar sem þessi stjórn er ekki vinna að neinu fyrir okkur íslendinga eins og er.  Kosningar myndu kannski líka neyða SF og VG til að endurskoða forystuna hjá sér og rifja upp stefnumálin sem þau virðast vera búin að týna.

[lydur arnason (IP-tala skráð) 9.1.2010 kl. 05:52]

Líklega eru kosningar ekki málið en segi stjórnin sig frá verkinu hlýtur forsetinn að íhuga utanþingsstjórn.

LÁ