ÍSLENZKAR MYNDIR, JÁ TAKK.

Kvikmyndagerðarmenn eru komnir upp á afturlappirnar.  Baráttufundur á morgun og bitið í skjaldarrendur.  Tilefnið er yfirlýsing RÚV varðandi kaup á innlendu dagskrárefni sem skera skal niður við trog.   Undanfarin ár má merkja mikla samloðun ríkisjónvarpsins við einkareknu stöðvarnar, 2-3 útlendar framhaldsseríur að kveldi, mestmegnis bófahasar.  RÚV hefur þó skartað einni og einni seríu frá meginlandinu, fræðsluþáttum á stangli og íslenzku efni þó æ minna beri á því.  Undantekning er eigin framleiðsla en hún ku vera dýr og misjöfn að gæðum.   Spurning hvort ríkissjónvarp eigi yfir höfuð að standa sjálft í myndaframleiðslu.  En tilvera ríkissjónvarps hlýtur að byggjast á menningarlegu framlagi viðkomandi þjóðar.  Verði innkaup á innlendu efni stöðvuð eða skert gæti heil iðnaðargrein með allri sinni reynslu og þekkingu tapast.   Reyndar tel ég sóknarfæri fyrir ríkissjónvarpið í íslenzkum kvikmyndagerðarmönnum.   Því miður hafa ráðandi aðilar sjónvarpsins kæft allt of mörg verkefni í fæðingu með áhuga- og sinnuleysi í stað þess að virkja þetta einstaklingsframtak með skynsamlegum skilmálum.  Útflutningur mynda ætti að vera jafn hægur og innflutningur, ekki síður nú þegar krónan er veik.   Þarna gæti sjónvarpið komið sterkt inn og aðstoðað við framgang íslenskra mynda erlendis gegn hlutdeild í innkomu.  Viðmót það sem sjálfstæðir kvikmyndagerðarmenn hafa mætt í þessari stofnun er ekki til að hrópa húrra fyrir og oft á tíðum tilfinningin sú að angur sé að.   Þessu þarf að breyta og fá inn fólk sem bæði sér ljósið og heldur haus.

LÁ

Athugasemdir

[Þorður Sævar Jonsson (IP-tala skráð) 25.1.2010 kl. 05:55]

Maður botnar hvorki upp eða niður í vitleysunni..........."Sparið og kaupið íslenskt"....Eða hvað?

[lydurarnason (IP-tala skráð) 25.1.2010 kl. 11:48]

Einfalt, Doddi Koddi.  Sé ætlun ríkissjónvarpsins að hætta að kaupa inn íslenzkt efni má leggja stöðina niður því hinar sjónvarpsstöðvarnar svala annarri eftirspurn.

LÁ

[Þorsteinn Guðmundsson, 25.1.2010 kl. 15:06]

Þetta er fínn pistill félagi. Ég póstaði hann á Facebook sem gamall meðframleiðandi þinn að stórmyndinni Tímavillingurinn sem trúlega með fyrstu og einu Science fiction myndum í íslenskri kvikmyndasögu.

Steini stuð.

[lydurarnason (IP-tala skráð) 26.1.2010 kl. 03:07]

Já, félagi Steini, költmynd það.  Þyrftum að framleiða eina nú í hallærinu og hnattvæða afraksturinn.

Kveðja, LÁ

[Þorsteinn Guðmundsson, 26.1.2010 kl. 08:07]

Til er ég :)