FJALLABRÆÐUR Í HEIMABYGGÐ.

Flateyri við Önundarfjörð er með þekktari dreifbýliskjörnum enda þar jafnan mikill atgangur.  Í gærkvöldi var atgangurinn góður enda sjálfir Fjallabræður mættir í heimabyggð.   Var öllu til tjaldað og íþróttahúsið kúfyllt.  Fjallabróðir númer eitt sleit barnsskónum á Flateyri og litlu betri en ég á hljóðfæri þegar við áttumst fyrst.  Nú orðinn töluvert betri heillaði hann sal gærkvöldsins með styrkri stjórn, röggsamur og lítillátur í senn.   Fjallabræður eru fyrirbæri, einhverskonar alþýðleiki sem skírskotar til hjartans.   Í þeim sameinast ís og eldur, kvóti og kvótaleysi ásamt farfuglinum sem fer ekki raskat.   Þakka bræðrunum kraftmikla kvöldstund og eftirminnilega.  Megi þeir aldrei þagna.

LÁ

Athugasemdir

[Sigurður Grétar Guðmundsson, 14.3.2010 kl. 17:21]

Flateyri við Önundarfjörð er með þekktari dreifbýliskjörnum

Lýður, hvers vegna notarðu ekki gamalt og gott orð um þitt ágæta byggðarlag og kallar það einfaldlega "ÞORP". Ég segi fyrir mig; það er allt í lagi að mynda og nota ný orð en er það framför að nota orðið "DREIFBÝLISKJARNI"

Flateyri er með þekktari þorpum á landsbyggðinni.

Hvað segirðu um þessa setningu?

Lýður, ég tek það fram að ég bý í þorpi sem heitir Þorlákshöfn

[Lýður Árnason, 15.3.2010 kl. 03:42]

Sæll, Sigurður Grétar og þakka ábendinguna.  Nota þó gjarna orðið "dreifbýliskjarni" um þorp sem búið er að sameinast öðrum þorpum.  Í mínum huga er þorp sjálfstætt samfélag en kjarni hluti af heild.   

Kveðja, LÁ