NÁ FRJÁLSLYNDIR FLUGI?

Einhverntíma var ég handgenginn frjálslynda flokknum og fagnaði góðum byr í aðdraganda kosninga 2007.   En illu heilli setti ágætur formaður flokksins traust sitt á rangan hest og úrslit kosninganna í samræmi við það.  Friðleysi fylgdi í kjölfarið og framámenn  náðu ekki saman.  Ósættið kristallaðist í brottfalli flokksins af þingi í síðustu kosningum.  Sannaðist þar hið fornkveðna að valdatafl vina endar oft í áhrifaleysi allra.  Formaður flokksins hefur nú ákveðið að draga sig í hlé, heldur seint að mínu mati.  Vonandi á hann þó eftir að hasla sér völl á nýjum vettvangi.  Spurningin er hinsvegar hvort frjálslynda flokknum takist að rísa upp úr öskustónni og ná tangarhaldi á ný.  Óska honum velfarnaðar í því og hvet nýja forystu að forgangsraða málefnum fram yfir menn.

LÁ

Athugasemdir

[Árni Gunnarsson, 17.3.2010 kl. 10:08]

Eigum við nokkurn annan kost? Samfylkingin og Vg eru glóandi af heift að slást við Ólínu Þorvarðardóttur sem er eini fulltrúinn á Alþingi úr þeirra röðum sem heimtar að staðið verði við kosningaloforðin.

Jón sjávarútvegs skelfur og nötrar af hræðslu eins og foli sem teymdur er yfir ís járnalaus á framfótum. Hann langar til að gera eitthvað en er svo hræddur við Hafró að hann má sig vart hræra.

Sigurjón Þórðar tekur vonandi við forystu Frj. fl. og ég ætla að gefa honum tækifæri. Eitthvað verður að gera.

[lydurarnason (IP-tala skráð) 17.3.2010 kl. 13:31]

Já, Árni, er sammála um að fúaviður fjórflokksins er eldiviðarmatur og varla það.  Sigurjón reyndist skeleggur á þingi og tæpitungulaus.  Gæti sem formaður gert góða hluti en auðvitað ekki án stuðnings.   Sjáum hvað setur.

LÁ 

[Viðar Helgi Guðjohnsen, 17.3.2010 kl. 14:06]

Er hægt að treysta einstakling sem með svikum gerðist smaladrengur Guðjóns Arnars til þess að fá formannstitilinn á silfurfati? Svik Sigurjóns eru gleymd en ekki gleymd. Ég vona að þetta lík Frjálslynda flokksins, sem mér þótti afar vænt um, fái að hvíla í friði.

[Viðar Helgi Guðjohnsen, 17.3.2010 kl. 14:07]

Er hægt að treysta einstakling sem með svikum gerðist smaladrengur Guðjóns Arnars til þess að fá formannstitilinn á silfurfati? Svik Sigurjóns eru geymd en ekki gleymd. Ég vona að þetta lík Frjálslynda flokksins, sem mér þótti afar vænt um, fái að hvíla í friði.

[lydurarnason (IP-tala skráð) 18.3.2010 kl. 01:04]

Sæll, Viðar.  Má vera að flokkurinn sé best geymdur á kistubotni.   Allavega leiddist mér sem óbreyttum flokksmanni mikið þær erjur sem viðgengust.  Held þó áhvílandi skyldu allra íslendinga að gæta að öllu stjórnmálalífi utan fjórflokksins og hlúa að því sem lífvænlegt er. 

LÁ

[Guðrún María Óskarsdóttir., 18.3.2010 kl. 01:38]

Því miður hefur Viðar meðferðis sannleikann um þessi mál, en framkoma manna við mig áður en ég yfirgaf þennan flokk með vitund þeirra sem eftir voru er eitthvað sem engum stjórnmálaflokki væri heiður að viðhafa.

kv.Guðrún María.

[Viðar Helgi Guðjohnsen, 18.3.2010 kl. 12:52]

Það er ekkert sem fjórflokkurinn vill meira en þægilega lítinn flokk þar sem gagnrýnisraddirnar liggja. Ástæðan er einföld, því ef þessar raddir væru innan fjórflokksins gæti skapast grundvöllur til breytinga.

Breytingarnar verða að koma innan frá.

Kv.
Viðar Guðjohnsen

[lydur arnason (IP-tala skráð) 23.3.2010 kl. 02:28]

Held, Viðar, að breytingar innanfrá séu erfiðar því hver sá sem syndir á móti straumi er settur til hliðar.  Viðhlæjendur fá hinsvegar aðgang og jafnvel vegsauka.  Því sting ég minni skóflu utangarðs.

LÁ