ÖLLU GRÍNI FYLGIR ALVARA.

Fylgi svonefnds Besta flokks virðist koma mörgum í opna skjöldu.  Sjálfstæðismönnum í borginni hrýs hugur og vísa skelfdir í bankahrunsskýrsluna.  Hana hygg ég ekki meginorsökina fyrir auknu þori almennings til að breyta til.  Það er einfaldlega sprottið úr þeim jarðvegi sem klíkustjórnmálin skópu.   Fólk getur gert lítið úr framboði grínistans en hann hefur hugsanlega slegið hinn eina sanna tón, vitandi eða óafvitandi skiptir ekki máli.   Eftir að hafa rústað efnahag landsmanna, fyrirgert öllu trausti innanlands sem utan, búið sjálfum sér umgjörð utan allra siðferðismarka, skrumskælt frelsið og úthlutað auðlindum þjóðarinnar í trássi við vilja og hag heildarinnar eru hrunflokkarnir loksins að uppskera í samræmi við það sem niður fór.  Vona Jón nái hreinum meirihluta í borginni og kveiki síðan elda um land allt.   Gangi þér vel, Jón.

Athugasemdir

[Gísli Foster Hjartarson, 1.5.2010 kl. 10:05]

Gæti ekki verið meira sammála þér

[Sigurgeir Jónsson, 1.5.2010 kl. 11:30]

Jón Gnarr styður ekki ríkisstjórnina.Vonandi verður hann forsætisráðherra sem fyrst.

[Helgavalan (IP-tala skráð) 2.5.2010 kl. 18:23]

Mér finnst að Lýður Árnason eigi að verða bæjarstjóraefni Bestaflokksins í Bolungarvík og nágrenni!

Þá skal ég flytja lögheimilið mitt til þín og kjósaðig

[lydurarnason (IP-tala skráð) 3.5.2010 kl. 00:56]

Ekki mun ég taka að mér bæjarstjórn í Bolungarvík að sinni en ætli Bezti Flokkurinn sér einhverja hluti í næstu alþingiskosningum er aldrei að vita hvernig sveifin snýst....

LÁ