Ó BORG, MÍN BORG.

Mikið dásamlega hefur sjálfstæðisflokkurinn lítið lært.  Gerir skoðanakönnun og bregður svo yfir hana teppi vegna óhagstæðrar útkomu.   En einhver svipti hulunni og niðurstaðan fauk út um alla borg.   Og núna blasir við sá möguleiki að hvorki Hanna Birna né Dagur verði borgarstjórar.   Enda hvers vegna í ósköpunum ætti fólk að kjósa þessa tvo flokka?   Báðir nettengdir köngulóm viðskiptalífsins og geta litlu um þokað í þjóðlífinu.  Báðir flokkarnir eru ónýt stjórnmálaöfl og sýsl þeirra meira í líkingu við rottur í klóakrörum en mennska stjórnarhætti.   Auðlindaafsalið til Magma lýsir þessu ágætlega, skyndiákvörðun vegna rottugangs í stað þess að móta heildræna auðlindastefnu með hag þjóðarinnar að leiðarljósi.   Eflaust skilja margir hollvinir ess-flokkanna ekkert í þessum grallaragangi í  fyrrum borg Davíðs enda vænisýkin (paranoja) andstæða kímnigáfunnar.   Efalítið vona þessar náhirðir  allar að Besti Flokkurinn sé bóla sem springi og það helst fyrir kosningar.  Sú von er borin en engu að síður er meirihlutasamstarf ess-flokkanna raunhæfur möguleiki og slíkt gæti reynst Jóni Gnarr og félögum dýrkeypt.  Einfaldlega þess vegna taka ess-flokkarnir þennan kost verði hann fyrir hendi.   Og dúllurnar tvær, Hanna Birna og Dagur, skipta með sér kjörtímabilinu.  Afhverju þykist ég svona viss um þetta?  Vegna þess að í Besta Flokknum býr sprengikraftur sem velt gæti öllu gamla draslinu úr sessi á landsvísu.  Því ríður á að drepa græðlinginn í fæðingu.   Andsvar Besta Flokksins er að mínum dómi skýrt:   HAFNA BÁÐUM ÞESSUM FLOKKUM, þeir standa fyrir ónýtum gildum og óstjórntækir nema fyrir takmarkaða hópa.  Með slíkri yfirlýsingu myndi Besti Flokkurinn horfa fram á veginn og yrði ekki bara andsvar Reykvíkinga við hrunflokkunum heldur landsins alls.  Og tryggja jafnframt eigið framhaldslíf.   Pælið´i í þessu, þið Bestaflokksfólk.

LÁ 

Athugasemdir

[Þorður Sævar Jonsson (IP-tala skráð) 18.5.2010 kl. 06:24]

UBBS!!!---Nú tekur Skrækur að skjálfa.  Þegar að er gáð, þá er listi Besta flokksins ótrúlega vel mannaður.  Sá sem skipar annað sæti listans, Einar Örn Benediktsson, er fyrrverandi Sykurmoli.  Ég held, að hann sé lærður fjölmiðlamaður..... Hann getur komið fyrir sig orði----Svo eftir er tekið.

[Árni Gunnarsson, 18.5.2010 kl. 07:51]

Þetta er skörp úttekt og sterk aðvörun til kjósenda. Betur að sem flestir lesi. Undarlega margir virðast óttast það að "reyndir stjórnmálamenn" hverfi af vettvangi og borgin lendi í höndunum á alvörulausum kjánum.

Þegar mér kemur "reyndur stjórnmálamaður" í hug fer ég ævinlega að óróast og ég fer að skima í kringum mig eins og maður með slæma samvisku.

Næst rottunum og helv. húskrabbanum er ekkert sem ég óttast meira núorðið en reyndur stjórnmálamaður.

Alveg væri það yndisleg tilhugsun að sjá borgina í höndum snillinga úr röðum listamanna í svona eitt kjörtímabil það minnsta. 

[Ólafur Ingi Hrólfsson, 18.5.2010 kl. 08:20]

Þegar ég las pistilinn hugsaði ég með mér - þvílík samsuða af þvættingi - svo þegar ég las skrif Árna Gunnarssonar var það endanlega ljóst að ekki var heil brú í skrifum næturlæknisins -Árni er honum sammála -  virðist mér hann hafa farið í smiðju annars læknis - Dags B. nú eða Ólafs Fr.

Læknar - læknið sjálfa ykkur -

[Sigurjón Jónsson, 18.5.2010 kl. 10:19]

Ég treysti þessum góða lækni vel til að skoða þjóðmálin frá sjónarmiði heilbrigða manns.

Og sem stuðningsmaður Sjálfstæðisflokksins til margra ára get ég lýst því yfir að ég treysti Besta flokknum betur en öllum hinum til samans.

[lydurarnason (IP-tala skráð) 18.5.2010 kl. 11:31]

Ávallt gleðiefni þegar Árni lætur í sér heyra, bæði er maðurinn hnífskarpur og fyndinn.   Met hann mikils.  Ólafi Inga vil ég benda á læknisfræðiskor í Háskóla Íslands, námið tekur sex ár og hafi fólk það af hverfur öll styggð eða fælni gagnvart faginu og því fólki sem í því starfar.

LÁ  

[Haraldur Sveinbjörnsson (IP-tala skráð) 18.5.2010 kl. 13:21]

"Fyndið" að það sé verið að minnast á Einar Örn sem mann sem getur komið fyrir sig orði. Hefur eitthvað heyrst í honum í kosningabaráttunni? Hvað stendur hann fyrir? Mun hann beita sér gegn því að orkuveitan verði einkavædd frekar eða er hann með því?

Fólk heldur áfram að láta leiða sig um götur borgarinnar hummandi grípandi lag flautuleikarans Jóns Gnarr, líkt og það hefur gert undir svipuðum lagstúfum útrásarvíkinga og spilltra stjórnmálamanna...

[Björn Hjálmarsson (IP-tala skráð) 18.5.2010 kl. 20:58]

Kæri Lýður. Af hverju er Besti flokkurinn ekki að bjóða fram í Bolungarvík? Bíður það næstu alþingiskosninga?

[lydurarnason (IP-tala skráð) 18.5.2010 kl. 22:01]

Kæri, Björn.  Hér ríkir nú óvissuástand, bæði persónulega og í pólitíkinni þannig að inngrip í bæjarmálin verða einungis menningarlegs eðlis, að þessu sinni.  Minni þó á að landsmálin eru framundan.

Kveðja, LÁ