OKBERAR HRUNSINS.

Styrmir Gunnarsson, fyrrum ritstjóri morgunblaðsins, og af mörgum áður talinn einn valdamesti maður landsins situr nú á friðarstóli og ritar bækur um hrun og hrunverja.  Saman tekið má segja að ritstjórinn lýsi íslenzku samfélagi sem mafíusamfélagi og hann sjálfur innarlega í búri.   Að mati Styrmis hefur valdatafl og hagsmunagæsla gegnsýrt alla stjórnsýslu og fjölmiðla.  Og nú, aldinn að árum, upplýsir hann þjóð sína um hið illa gangverk sem hratt henni loks fram af bjargbrúninni.  Frá manni sem var í hringiðunni miðri eru þetta merk tíðindi og eftirtektarverð, ekki sízt í ljósi þess hve margir samtíða- og samstarfsmenn hans ráfa enn í myrkrinu.   Nefni sem dæmi Halldór Ásgrímsson og nýlegt kastljósviðtal við hann.  Maðurinn átti mörg helstu pungspörk hrunadansins en lætur sem ekkert sé.   Davíð Oddssyni virðist hinsvegar líða ver, í fasi hans örlar á samvizku.  En er Davíð landráðamaður?  Sveik hann þjóð sína?  Ekki veit ég það en hann hefði mátt gæta hennar betur.  Hann var foringinn og honum var treyst.   Eftirmanni hans var síður treyst og reyndist hann þjóðinni að vonum.   Kannski var Ingibjörg Sólrún sýnu verst, hún kom sá og gerði ekki neitt, féll með draumi annarra.   Allt þetta fólk upplifir nú erfiða daga og á kannski aldrei afturkvæmt í þeim efnum.  Okið sem á þeim hvílir er mikið og kannski er atgangur Styrmis á ritvellinum ekki bara sannleiksþráin ein heldur líka aflausn.  Þöggun getur nefnilega verið sálarmein og þeim ráð sem rækja að hafa með sér farsíma yfir gröf og dauða.  Kannski snýst þeim hugur.

LÁ            

Athugasemdir

[Flosi Kristjánsson, 25.5.2010 kl. 09:55]

Hef lesið Styrmi og finnst hann giska opinskár og hreinskilinn. Orð þau sem eftir honum eru höfð um "ógeðslegt samfélag" gætu átt einkar vel við þá stjórnmálamenn sem fram hafa komið hin síðari misseri. "Núna er það ímynd, frami og sæti á Alþingi sem öðru fremur ræður afstöðu og gerðum manna", gæti verið nánari útlistun á pælingum þess gamla. 

Jafnvel höfuðriddari hreinleika og réttlætis, núverandi fjármálaráðherra, er kominn í bland til tröllin og hendir öllum meginreglum og hugsjónum út um gluggann sem greiðslu fyrir sæti í hlýjunni.  Ætli Styrmir karlinn tæki ekki undir það?

[lydurarnason (IP-tala skráð) 25.5.2010 kl. 17:44]

Sæll, Flosi.  Æðatré fjórflokksins virðist vera eitt og hið sama þó greinarnar séu misstórar.  Skýrir líka gott gengi Besta Flokksins og fleiri nýframboða, fólk vill sjálfstæðan græðling og tilbúið að taka sjénsinn á blómum hans þó enginn viti hvers er von.

LÁ