HRAFNSEYRI VIÐ DÝRAFJÖRÐ.

Sautjándi júni 2010 var um margt merkilegur.  Jóhanna gladdi hægri menn með ranghermi um legu Hrafnseyrar, fæðingarstað Jóns Sigurðssonar, en hún ku hafa farið fjarðavillt.  Þetta axarskaft var því kjarni þjóðhátíðarræðunnar og líkur á að heitt sé undir aðstoðarmanninum.   ESB-aðdáendur fögnuðu aðildarviðræðum meðan andstæðingar ná vart upp í nef sér  yfir ósvífninni að spyrða rugluna við sjálfan þjóðhátíðardaginn.   Einhvernveginn held ég að 17. júní sé eilítið fyrir þjóðinni og ferming fermingarbörnum.  Uppsprettan er nokkuð á reiki og tilgangurinn óviss.   Ferming hefur miklu meira með veraldlega hluti að gera en æskilegt er og heitið sjálft nánast formsatriði.  Sömuleiðis hafa núlifandi kynslóðir ekki kynnst sjálfstæðisbaráttu.  Hvaða baráttumál núsins eru íslendingum sameiginleg?  Harla fá ef nokkur.  Sjálfstæðið, lýðveldið Ísland hefur fært okkur svo miklar gnægtir að meginviðfangsefnið er að rífast um skiptingu molanna innbyrðis.  Við sjáum ekki lengur Ísland, frónið farsælda, heldur dreifbýli og þéttbýli, einkavæðingu og ríkisvæðingu, sjálfstæðisflokk og vinstri menn, ESB og ekki ESB.  Svo er rétt upp hönd og meirihlutinn ræður.   Svokallað lýðræði.  Allt of lengi hafa ættir, flokksklíkur og hagsmunasamtök stjórnað þessu landi og til að brjótast undan því er auðvitað ákveðin lausn að ganga inn í ESB.  Andstæðingar inngöngu eru líka að hluta einmitt þessar sömu áðurnefndu ættir, flokksklíkur og hagsmunasamtök.   Sjá þessir hópar ekki að það er einmitt sérhagsmunahyggjan sem veldur því að við stöndum frammi fyrir atkvæðagreiðslu um aðild að ESB?  Hættið henni strax og takið þátt í auðlindavörnum þjóðarinnar með Ísland í huga, takið þátt í endurreisninni með Ísland í huga og þá er með góðri samvizku hægt að segja nei við ESB með Ísland í huga.

LÁ    

Athugasemdir

[þorður Sævar Jonsson (IP-tala skráð) 18.6.2010 kl. 22:59]

Í kosningalögum Bandaríkjanna er heimild til að leggja spurningar fyrir væntanlega kjósendur, hvað þeir vita helst um sögu landsins. Ef þeir geta ekki svarað auðveldum spurningum, þá hafa þeir ekkert með kosningarétt að gera.  Þannig héldu þeir svertingum í skefjum.

[Helga Kristjánsdóttir, 19.6.2010 kl. 03:10]

  Ekki tilheyri ég hagsmuna- klíkum,en er mjög á móti innlimun í ESB. Raunar enginn af þeim fjölda mörgu sem ég  þekki  af    ESB-andstæðingum.       Eiga ekki allar þjóðir sinn þjóðhátíðardag  og    helga reiti eins og Þingvelli,eru ekki átök allstaðar um gullið,víða um yfirráð á landsvæði og landamæra-deilur. Ég næ alveg upp í nef mér þótt 17.júní sé þeim í landsöluflokknum ekki eins kær og mér.Sá dagur hefur verið svo lengi haldinn hátíðlegur og er alltaf tengdur við sjálfstæði Íslendinga,ég get haldið því áfram.              Það þarf enga afgirta, uppskrúfaða ráðherra í Sögustund,á Austurvelli,til að mæða mig,

[lydurarnason (IP-tala skráð) 19.6.2010 kl. 04:25]

Doddi Koddi...  Hvort Jóhanna hafi vitað um Hrafnseyrina eður ei er lítilvægt.   Ég held að Dýrfirðingar séu ánægðir.  En alvit um sjálfstæðishetjuna góðu hefur a.m.k. ekki dugað eitt og sér til velfarnaðar í stjórnun landsins.  Og Helga, ég nefni það sérstaklega að langt í frá allir ESB-andstæðingar væru angar af hagsmunaklíkum, einungis hluti.  En rétt mælir þú að sumir gera grín að viðhorfi fólks til þjóðhátíðardagsins og samsama þúfnagangi.  Þú kallar það landsölufólk og víst vegur það þungt upp í fyrrnefndan þúfnagang.

LÁ

[Helga Kristjánsdóttir, 19.6.2010 kl. 05:13]

  Æi já ég er orðin forhert,það kraumar í mér reiði eins og svo mörgum. Gott að slíta sig frá smá stund,eins og í tafli,gá hvort ég sjái leið til sigurs. Ha, vitandi að ég er nú ekki einráð í þeim efnum vinur.

[Helga Kristjánsdóttir, 19.6.2010 kl. 05:18]

   Gleymdi  "tigninni", ég er Dýrfirðingur og á Þingeyri kynntist ég Ólafi R Grímss.Hann var lítill drengur hjá ömmu sinni og afa sóma fólki.