SJÚKRATRYGGINGAR.

Sjúkratryggingar hafa verið nokkuð í umræðunni og alltaf rekst maður á sama hlutinn:  Reglur og raunveruleg þörf fara ekki saman.  Út um allt land sækja dreifbýlingar læknisþjónustu sem ekki fæst í heimabyggð til suðvesturshornsins.  Ferðina kosta sjúkratryggingar þó ekki sé um bráðaþörf að ræða.  Þetta er eins og ákall til misnotkunar enda er það svo.  Í þéttbýlinu er grunnþjónustan í líki gatslitinnar blöðru og þegar vinstri hendin brotnar er sú hægri sett í gifs.   Þröskuldur til örorku fer hríðlækkandi og endurspeglar kannski viðhorf kynslóðanna.   Sjúkraþjálfun er niðurgreidd og kerfið nánast eins og sjálfsafgreiðsla, engar hömlur og lömun metin til jafns við vöðvabólgu.   Sama má segja um lyf, spurt er um hver séu niðurgreidd en  síður hvort þau séu nauðsynleg.   Læknar, sem helstu vegvísar heilbrigðiskerfisins, hafa algjörlega brugðist hvað þetta varðar.   Allir eru uppteknir við að lækna en enginn staldrar við og hugleiðir hvort lækningarinnar sé þörf.  Allt snýst um peninga og reglugerðir einnig.  Það er miklu betra að niðurgreiða ferðir svo læknarnir hafi nóg að gera, það er miklu betra að niðurgreiða lyf svo lyfjafyrirtækin dafni, það er miklu betra að hver einast kjaftur með harðsperrur fái sjúkraþjálfun svo stéttin svitni.   Þessi víðtæka yfirferð sjúkratrygginganna gerir þeim oft erfitt fyrir sem virkilega þurfa á hjálp að halda.   Flokkunarárátta kerfisins er ómanneskjuleg og rímar illa við stuðla og höfuðstafi lífsins.  Við verðum að stöðva þessa sjúkdómsvæðingu því hún hefur ekkert með heilbrigði að gera heldur er hún enn einn fúasproti græðgisvæðingarinnar títtnefndu.  Sjúkratryggingar eiga að vera öryggisnet  gagnvart  alvarlegum meinum og kostnaði vegna þeirra en ekki smáslummuskammtari almennings.   Þannig er kerfið í dag og svona lík þarf að bera af velli og fá inn frískan spilara.

LÁ

Athugasemdir

[Guðrún María Óskarsdóttir., 1.7.2010 kl. 02:05]

Rétt Lýður.

kv.Guðrún María.

[Þorður Sævar Jonsson (IP-tala skráð) 1.7.2010 kl. 06:43]

Kæri vinur ! ---- Hverju orði sannara, ---- en ekki til vinsælda fallið.

[lydurarnason (IP-tala skráð) 1.7.2010 kl. 11:15]

Má vera, Doddi Koddi, enda dugleysi einatt vinsælla en dugur.

LÁ

[Þorður Sævar Jonsson (IP-tala skráð) 1.7.2010 kl. 15:59]

Réttlætiskenndin hefur verið að angra mig.!!!

 Ef þú skaðar þig á nefinu,  þá fær þú það bætt.  Ef þú skaðar þig fyrir neðan nefið,  fær þú það nekki bætt. ----- Hvers vegna?  ----- Svar:  "Af því bara"  -----segja hinir vísu menn.

[lydurarnason (IP-tala skráð) 1.7.2010 kl. 20:19]

Sæll, Doddi Koddi.  Tannréttingar eru niðurgreiddar fram að 18 ára aldri.  Og í þær fara sannarlega margir.  Samt er þetta yfirleitt spurning um slit, skakkt bit eða fegrun.  Í umræddu tilviki þar sem stúlkan slasaðist þarf beinflutning til að hún teljist tannfé.  Og hún fær ekkert.   Séu lögin svona vitlaus skal þeim eytt.

LÁ