UNDIR BLÁHIMNI.

5° hiti í Bolungarvík í nótt, norðanbál og hálfgerður hryssingur.  Bænum skipt í blátt og rautt og hittust hinar andstæðu fylkingar á Þjóðólfsvegi núll.  Nokkrir hundar röltu skrúðgönguna.  Í ríkisstyrktum skógarlundi kyrjaði vargurinn síðan sönginn um göngin en hafði fyrr um daginn þegið ókeypis pylsur undir þakskeggi náttúrufræðistofnunar.   Frístundaveiðimenn sátu á bryggjupollanum og lönduðu framhjá vigt meðan löghlýðnir þorparar streymdu á dansleik.  Þar rifust menn um litinn á kirkjunni, kvótann og þorrablótið og dönsuðu á meðan polka.    Hljómsveit hússins var í andaslitrunum og leið inn í eilífðina með laginu um gula kafbátinn.  Síðan var gengið heim undir bláhimni.

LÁ  

Athugasemdir

[Ben.Ax. (Benedikt Jóhannes Axelsson), 3.7.2010 kl. 08:26]

Takk fyrir mig.

[Þorður Sævar Jonsson (IP-tala skráð) 3.7.2010 kl. 08:44]

Tækifærin til að fjasa eru sannarlega ekki látin ónotuð í Bolungarvík.