BLESS, VÍKIN MÍN KÆRA.

Í gærnótt var grjóthrun í Hólshreppi.  Gnýinn hélt ég fyrst skruggu en þegar svalahurðin fauk upp var ekki um að villast:  Grjóthrun í Hólshreppi.  Hinumegin lá kólguský yfir Jökulfjarðamynni, sem sagt norðanbál.   Þó ekki nógu svalandi til berjaslátrunar en nokkrar handfyllur týndi ég í dag og bar hróðugur fram með Bjarnarbúðarskyri.  Síðasta kvöldmáltíðin tómar landnytjar.  Í kvöldrokinu var þrammað framhjá vigt og ísprósentan skönnuð í söluskálanum.  Fyrir utan ástarvikuna er lausaganga hunda bæjarbúum hjartans mál og víða komnir gangstígar og brýr.  Grímsbrú einna þekktust.   Fullyrði að fá bæjarfélög geti státað af eins fullkomnu göngubrautarneti og verstöðin Bolungarvík.   Reyndar er útkeyrzlan í bænum orðin svo megn að fáir komast nema fljúgandi.  Hefur bóndinn á Hanhól enda kvartað yfir þungri umferð.  Arkandi kom ég  við hjá aðmírálnum í kveðjuskyni en sá hann draga fyrir glugga, ábyggilega haldið mig með skammir vegna húsbíls sem vitanlega er óhæfa í kommúnistareit.  Í sömu svifum bar sjálfstæðan íslending að garði og stal sá vindi úr dekkjum Leníns.  Þakkaði ég honum góða viðkynningu og bað hann fyrir áttvillta mús sem heima á í húskofa fyrrum bæjarstjóra.  Stalín.  Vona hann hafi komið henni til skila.   Áfram gakk.  Handan Grímsbrúar er svo skóglendið Bernódusarlundur en í honum er víðsýni mikið.  Með kíki er hægt að greina félagatal framsóknar í norðvestri og samfylkingar í suðaustri.   Í þessum bæ hvorutveggja fljótlesið.   Á rauðhól  nostraði niðurlendingur við ómelettugerð og voru þar þrjú börn í lausagangi.  Ávítaði ég túlípanann fyrir það.   Loks, í lúpínubreiðunni, rétt ókominn heim, sá ég staðfestingu vistaskiptanna, gáminn, bláan fyrir járnum.   Því segi ég:  Bless, Víkin mín kæra og öll okkar spor.  

LÁ

Athugasemdir

[Níels A. Ársælsson., 20.8.2010 kl. 11:45]

Heimsljós !

Farinn félagi Lýður ?

[Ben.Ax. (Benedikt Jóhannes Axelsson), 20.8.2010 kl. 16:17]

Þú ert miklu betri á flugi en mávarnir við Stjórnarráðið.

[Heiða Þórðar, 20.8.2010 kl. 16:51]

Snilldarlega samansaumaður  texti.

[Björn Jónsson, 21.8.2010 kl. 21:00]

Snilldin í textanum ekki síðri en saumaskapurinn á sári er þú saumaðir saman á hægri fótlegg mínum um árið.

[lydurarnason (IP-tala skráð) 22.8.2010 kl. 13:21]

Jú, aðmíráll, kominn á mölina og verð þar um sinn.  Mun þó sækja vesturtána heim innan skamms.  Og, Benedikt, kannski maður seti stefnuna á stjórnarráðið og setjist á mæninn kvakandi.  Þakka hrósið, Heiða og Björn, bródera hold sem minnst en vel þá sjaldan það gerist.

Kveðja, LÁ