ENDURSKOÐUN FISKVEIÐISTJÓRNUNAR.

Samkvæmt frétt Eyjunnar mun endurskoðunarnefnd fiskveiða skila áliti innan skamms.  Kemur fram að innköllun aflaheimilda verði að veruleika og tíminn sem það mun taka 20 ár.  Varðandi endurúthlutun eru tvær leiðir á borðinu, tilboðsleið þar sem markaðstorg kvóta tekur við tilboðum áhugasamra og síðan svokölluð samningaleið þar sem samið yrði um nýtingarrétt auðlindarinnar við einstakar útgerðir.  Síðan eru fjögur yfirlýst markmið:

1.  Að fiskistofnar séu eign þjóðarinnar og þeim ráðstafað af ríkinu.                               Þetta liggur þegar fyrir í lögum um fiskveiðar en samt hafa útgerðarfyrirtæki komist upp með að umgangast aflaheimildir sem sína eign og veðsett að vild. 

2.  Ráðstöfunin gildi í tiltekinn tíma og veiðiheimildunum deilt út eftir tilteknum reglum.     Hingað til hefur kvóta verið úthlutað til eins árs í senn og eftir tilteknum reglum, þeim að fyrirliggjandi kvótahafar hafa hlutfallslega gengið að rétti sínum vísum.  

3.  Gjald verði tekið fyrir nýtingarréttinn, mun hærra en núverandi auðlindagjald.                 Mikið hefur verið kvartað yfir núverandi auðlindagjaldi og því fróðlegt að fylgjast með málalyktum. 

4.  Nýtt kerfi tryggi jafna aðkomu allra að veiðiheimildunum og opni á nýliðun í greininni.   Samkvæmt þessu hlýtur tilboðsleiðin að vera ofan á því samningsleiðin miðar að fyrirliggjandi útgerðum samkvæmt lýsingu. 

Þrátt fyrir ýmsar mótsagnir og óskýrleika er margt í þessum tillögum bitastætt.  Endanlega útfærsla er þó í höndum þingsins og þá reynir á styrk og stór orð.   Þjóðin getur þó fagnað því að loks er eitthvað að gerast í þessu mesta þrætuepli þjóðarinnar.

LÁ   

Athugasemdir

[Árni Gunnarsson, 31.8.2010 kl. 09:40]

Verði uppboðsleiðin farin spái ég því að nokkur fjöldi þeirra útgerða sem telja sig ekki geta greitt 5 kr. í nýtingargjald muni með bros á vör yfirbjóða alla nýliða í greininni.

Það ættu þeir auðveldlega að geta þegar þess er gætt að núverandi kerfi í stjórnsýslu sér um að afskrifa eftir þörfum allar skuldir útgerða yfir milljarði.

Um þá "lausn" eru fjórir af hverjum fjórum stjórnmálaflokkum sammála.

[lydurarnason (IP-tala skráð) 31.8.2010 kl. 10:09]

Kórrétt, Árni Gunnarsson.  Tilboðsleiðin innleiðir þó þá nýjung að þjóðin innheimtir alvöru auðlindagjald.  Hverjir veiða skiptir hana minna máli.  Afskriftir milljarða eru óhjákvæmilegir en sé það gert án innköllunar kvóta líka óásættanlegar.  Afskriftir samhliða innköllun og endurúthlutun nýtingarréttar í ákveðinn tíma, hámark 10 ár, ásamt skýru ákvæði um ævarandi þjóðareign auðlinda er vænsti kosturinn í stöðunni.   Seint sé ég þó fjórflokkinn einhuga um það.

LÁ 

[Árni Gunnarsson, 31.8.2010 kl. 20:19]

Vænsti kosturinn mun nú í þessu máli sem flestum öðrum verða talinn sá kostur sem líklegastur er til að þjóðin sættist á.

Og galdurinn við að finna þá lausn blandast þeirri tækni að fá þjóðina til að trúa því að í lausninni felist eitthvað annað en raunveruleikinn mun leiða í ljós.

[Lýður Árnason, 1.9.2010 kl. 02:18]

Spyrjum að leikslokum en líklega áttu kollgátuna.

LÁ