HVÍSLARAR Á ÞINGI.

Þingkona framsóknarflokks segir Össur utanríkisráðherra kominn með hvíslara í Þráni Bertelssyni sem ku vera genginn til liðs við græningja.   Klikkir svo út með nafnakalli svokallaðra flokkaflakkara.  Þar á meðal er Kristinn H. Gunnarsson, fyrrverandi þingmaður framsóknarflokksins.  Sá maður gagnrýndi fyrstur allra einræði Halldórs og Davíðs og tiltók m.a. Íraksstríðið og viðkomu okkar á lista hinna viljugu.  Kristinn átaldi mjög vinnubrögð einræðisherranna og vildi þingræði í stað ráðherraræðis.  Fyrir vikið missti hann stöðu þingflokksformanns og fljótt fjaraði undan honum í flokknum.  Þó allir sjái nú að Kristinn hafi klárlega farið með rétt mál í gagnrýni sinni stóð ENGINN framsóknarþingmaður með honum þó nú vilji allir Liljuna kveðið hafa.  Í raun var það ekki Kristinn sem flakkaði frá flokknum heldur flokkurinn frá yfirlýstum hugsjónum sínum.  Flestir láta slíkt óátalið í metorðaklifri sínu, færri brúka munn enda árangurinn gjarnan sá að verða hornreka.   Flokkaflakk hefur niðrandi merkingu en skoði fólk það sem að baki býr má oft sjá hið gagnstæða.  Hvort Þráinn verði hvíslari Össurar veit ég ekkert um en hvísl framsóknarmanna í formannstíð Halldórs bergmálar enn, bergmálar enn. 

LÁ    

Athugasemdir

[Þorður Sævar Jonsson (IP-tala skráð) 9.9.2010 kl. 09:10]

Kristinn H. Gunnarsson er dæmi þess, að vönduð vinnubrögð og sannleikurinn er ekki liðinn á Alþingi Islendinga.

[lydurarnason (IP-tala skráð) 9.9.2010 kl. 11:14]

Doddi Koddi.   Vek athygli þína á brotthvarfi KHG af þingi og fullyrðing þín því í trausti annarra.

LÁ

[Sigurður Hreiðar, 9.9.2010 kl. 11:23]

Menn sem fljóta inn á þing í krafti fjölda atkvæða á lista sem þeir eru á eiga ekki þau atkvæði heldur listinn sem ber þá fram. Því er fráleitt að þeim líðist að svíkja kjósendur listans og færa sig á milli fletja í stjórnmálum eftir því hvar koddinn er mýkstur hverju sinni. Hafi þeir ekki hug og dug til að vera málsvarar þess sem lista sem þeir voru kosnir fyrir eiga þeir að víkja af þingi og láta næsta mann af listanum fara inn í staðinn. -- Annað er þjófnaður og svik við kjósendur, sem kusu ekki manninn heldur listann.

[lydurarnason (IP-tala skráð) 9.9.2010 kl. 12:45]

Sæll, Sigurður Hreiðar.  Er sammála, atkvæði tilheyra listum, ekki einstaka mönnum. Því eiga menn að berjast áfram innanflokks kjörtímabilið á enda og skipta síðan ef ástæða er til.  Bendi hinvegar í pistli mínum á viðbrögð flokkskjarna við gagnrýni og útskúfun þeirra sem hana viðhafa, jafnvel þó réttmæt sé.   Auðvitað viljum við sjá flokka ganga í takt en verra er þó þöggun fram í rauðan dauðann til að svo verði. 

LÁ

[Björn Hjálmarsson (IP-tala skráð) 9.9.2010 kl. 21:48]

Ef flokkur tekur að svíkja hugsjónir sínar og yfirlýsta stefnumótun þá eru það svik við kjósendur. Við þessu bregðast þeir hjartahreinu með því að mótmæla. Ef flokkurinn tekur ekki sönsum þá er eina ráðið að segja sig úr flokknum. Foringjaræði í stjórmálaflokkum hefur reynst okkur fallvalt. Það styrkir góðan leiðtoga að fá gagnrýni úr eigin flokki. Það virðast menn eiga erfitt með að skilja.

[lydurarnason (IP-tala skráð) 10.9.2010 kl. 01:31]

Þú orðar hlutina best, félagi Björn, og hef ég engu við að bæta.

LÁ