FRJÁLSAR STRANDVEIÐAR.

Jón Bjarnason sjávarútvegsráðherra telur strandveiðar hafa sannað gildi sitt.   Held marga honum sammála og ég sjálfur í þeim hópi.  En hvers vegna ætti ekki að ganga skrefið til fulls og gefa strandveiðar frjálsar?  Slíkt myndi hafa í för með sér aukna verðmætasköpun fyrir þjóðina, auka atvinnu og blása lífi í sjávarbyggðirnar.   Leiguoki smábátasjómanna yrði aflétt og hægt að búa til nýjan tekjustofn með sanngjörnu auðlindagjaldi sem tekið yrði jafnóðum af hverju lönduðu fiskkílói.  Engin hætta er á ofveiði með krókadrætti og landlegur augljóslega tíðari en á stærri bátum sem þola meiri veður.  Hvers vegna er þetta ekki gert?  Er það vegna þess að kvótahafar þola ekki aðgengi að fiskimiðunum nema á þeirra forsendum?   Sjá þeir á bak leigutekjum?  Eru þeir kannski hræddir um að hagkvæmni smábátaútgerðar komi í ljós?   Arfabúntið sem stórútgerðarmenn flagga að þjóðinni samanstendur af skuldsetningu, afskriftum og arðráni.  Bankinn fær vextina, þeir arðinn og þjóðin ekki neitt.   Hefðum við átt að hafna fæðingarorlofi á sínum tíma af tillitsemi við ömmurnar?  Eða vera öll ennþá takandi á filmu vegna þeirra sem ættu slík tæki?   Þó kvótakerfinu og sérlega þó kvótaframsalinu verði umbylt mun sjávarauðlindin ekki synda á brott heldur vera áfram til hagsældar og stuðla að framförum í greininni.  Vandamál sjávarútvegs á íslandi er úrelt lénskerfi sem hamlar allri nýliðun og þar með nýsköpun.  Telji núverandi handhafar veiðiheimilda þetta fjarstæðu ætti þeim að vera í lófa lagið að taka slaginn við strandveiðina og sýna þjóðinni allri snilld sína og framtak.

LÁ

Athugasemdir

[Kristinn Pétursson, 16.1.2011 kl. 04:09]

Þetta er mikill kjarni málsins. Ofstjórnin hefur gengið allt of langt.

Í raun þurfti svo víðtæk takmörkun á atvinnufrelsi sem komið hefur verið á í krókaveiðum - að fara gegn um "stjórnarskrársíu"....

álitaefnið er - má takmarka krókaveiðar með þeim hætti sem gert hefur verið.

Ég tel svo ekki vera.

Grundvallaratriði - forsenda til takmörkunar á mannréttindum stjórnarskrár - er að  almannaheill - liggi til grundvallar takmörkun á mannréttindum þar með töldum atvinnufrelsi til krókaveiða - (með almennum takmörkunum)

Nýtt sjónarmið á að koma úr gagnstæðri átt.... má takmarka krókaveiðar - eins og gert hefur verið - hver er "áhættan" af því að leyfa frjálsar krókaveiðar - innan almennra skynsamlegra takmarkana sem gilda þá fyrir alla.

Líklegasta svarið við spurningunni "hver er áhættan af frjálsum krókaveiðum er.

ENGIN áhætta.

Á stjórnlagaþingi - vona ég að þú takir þetta mál upp - á þessum forsendum.  Ég get rökstutt ´þetta álitaefni - þegar í vilt - sendu mér bara línu  [e-mail]

Takk fyrir þessa færslu KP

[Valdimar Samúelsson, 16.1.2011 kl. 10:42]

Ég hef alltaf verið hlynntur frjálsum krókaveiðum með ákveðnum fjölda króka svo sem 40/60 bjóð miðað við að það sé heimalandandi bátar og miðað við að hann fari í vinnslu á landinu.

Ég tel að það ætti að afturkalla allan kvóta og leigja hann til kvótakónganna á sama verði og þeir leigðu öðrum. Það er sanngirni. 

[Sigurður I B Guðmundsson, 16.1.2011 kl. 11:45]

Þetta er heila málið. Ekki flókið en virðist erfitt í framkvæmd. LÍÚ hvað!!!!

[Níels A. Ársælsson., 16.1.2011 kl. 11:55]

Þetta er allt rétt og satt.

En því miður þá læðist að mér sá grunur að Steingrímur J. Sigfússon búrtík Samherja hf, hafi engan áhuga á neinni viðbót inn í strandveiðarnar.

Þeir ætla sér að halda áfram að niðurlægja okkur og leyfa okkur að róa 2-3 daga í mánuði eins og verið hefur síðustu 2 sumur.

Þannig klára þeir að eyðileggja okkur endanlega, það var líka markmiðið og aldrei neitt annað stóð til.

Fjórflokkurinn er staðreynd.

[Níels A. Ársælsson., 16.1.2011 kl. 11:58]

Það verður engu breytt fyrr en við róum tugum saman um land allt og gefum skít í kerfið.

Það kallast víst uppreins og er mjög gott orð yfir það sem þarf að gera.

Kerfið mun ekki falla fyrr en stjórnmálaflokkarnir falla í núverandi mynd.

[Haraldur Baldursson, 16.1.2011 kl. 18:59]

Heyr heyr !

Flott grein, sönn og þörf.

[lydurarnason (IP-tala skráð) 16.1.2011 kl. 19:45]

Þakka traustið, Kristinn Pétursson, eflaust munum við rugla saman reitum fyrr en síðar.  Auðlindaákvæði er eitt minna baráttumála í gerð nýrrar stjórnarskrár, hvort ákvæði um frjálsar strandveiðar rúmist þar inn í kemur í ljós.  Annars er þögn fylgismanna kvótakerfisins orðin áberandi og má leiða að því líkum að málstaður þeirra sé ekki bara gjaldþrota heldur líka rökþrota.

Kveðja, LA

[Þórður Már Jónsson, 17.1.2011 kl. 23:55]

Satt og rétt Lýður Árnason, svo má benda á rök Kristins Péturssonar varðandi kröfur stjórnarskránnar fyrir takmörkun á atvinnufrelsi. Gaman er að sjá að umræðan skuli loksins vera farin að snúast um aðalatriði, kjarna málsins, en ekki aukaatriði líkt og LÍÚ reyna að stýra umræðunni í átt að.