EYRARODDI KVEÐUR.

Fiskvinnslan Eyraroddi  á Flateyri heyrir nú sögunni til.  Aðdragandinn verið nokkur og margir því viðbúnir högginu.   En skaðinn er jafn mikill þó niðurstöðunni seinki.  Flateyri er dæmigert sjávarþorp, liggur í faðmi hafs og fjalla, búið að verja það frá ógnum vetrarins og tengja það við lykilsvæði með göngum.   Manni liggur við að spyrja, til hvers?  Kvótaframsalið firrti bæinn atvinnurréttinum og angi sama kerfis rústaði smábátaútgerðinni með kvótasetningu ýsu og steinbíts fyrir nokkrum árum.  Og enn spyr maður, til hvers?   Nánast allir sjómenn viðurkenna að ekki sé hætta á ofveiði með krókaveiðum.   Svo tala menn um byggðakvóta, byggðastofnun, ívilnanir og aðrar sértækar lausnir þegar við blasir að gefa strandveiðar einfaldlega frjálsar.  Slík ráðsöfun hefði hugsanlega bjargað Eyrarodda um það  hráefni sem vantaði.   Hvaða hagsmuni er eiginlega verið að verja?

LÁ

 

 

 

 

 

 

 

 

 

Athugasemdir

[Óskar Helgi Helgason (IP-tala skráð) 18.1.2011 kl. 01:49]

Heill og sæll Lýður; jafnan !

Á ferðum mínum; víðsvegar (m. þjónustuvörur fyrir landbúnað - sjávarútveg og málmiðnað) um land, hefi ég eggjað menn til, að hunza ráðslag og ströggl Jóns Bjarnasonar / Hafrannsóknar stofnunar Jóhanns frænda míns Sigurjónssonar, auk Fiskistofu Þursanna; án þess árangurs, sem ég vænti helzt - og; að einhver snefill blóðdropa, frá Landnámstíð, rynni enn, í æðum sjómanna og útvegs bænda, að nokkru.

Sú; hefir raunin hvergi verið, og geta landsmenn sér um kennt, allrækilega sjálfum, víðast.

Ég var; Birgðavörður freðfiskjar, í minni gömlu heimabyggð, á Stokkseyri,, árin 1983 - 1991, hjá Hraðfrystihúsi Stokkseyrar h/f, og sá í sjónhending; hversu fara kynni, með upptöku kvóta fjandans - sem og; raun bar síðan vitni um, þar í plássi, sem víða annars staðar.

Upp á landsmenn stendur; að hrekja skaðræðis öfl stjórnmálanna, úr hreiðri sínu, við Austurvöll í Reykjavík, með harðneskju mikilli - og vera kann; að slík aðgerð, kynni að leiða til endurreisnar lands og lýðs og fénaðar alls, Lýður.

Við sjáum nú; þessi dægrin, hversu myndarlega Túnis menn (afsprengi; hinna fornu Karþagó manna), taka á sínum málum, þar syðra.

Íslendingum er; vorkunnarlaust, að feta þeirra slóð - sem margra annarra, læknir góður.

Með beztu kveðjum; sem áður - og fyrri, úr Árnesþingi /

Óskar Helgi Helgason     

[Gunnar Guðmundsson (IP-tala skráð) 18.1.2011 kl. 09:09]

Mikið rétt Lýður,

Það virðast margir hafa gleymt því hvernig kvótakerfi og kvótaframsal vóg að rótum lífsviðurværis í þorpunum vestra.  Þetta fannst mér krystallast í yfirborðsumfjöllun í þættinum ,,Landinn" á RÚV s.l. sunnudag, - hvar reynt var að skýra ástæður geigvænlegrar fólksfækkunar á Vestfjörðum án þess að minnast á tvo af stóru ahrifavöldunum, - fiskveiðar / kvóta og samgöngur.  Hversvegna var verið að spyrja fólk, sem aldrei hefur til Vestfjarða komið, hvort það vilji búa þar ?

[Níels A. Ársælsson., 18.1.2011 kl. 09:17]

Það þarf eiginlega ekkert að ræða þetta neitt frekar.

[lydurarnason (IP-tala skráð) 18.1.2011 kl. 14:00]

Sæll,Óskar Helgi.  Þrælslund og undirgefni markar oft pláguhrjáðar þjóðir og víst hafa íslendingar ekki farið af slíku varhluta.  Seigla vegur á móti ofangreindu og spá mín sú að landsmenn munu upp rísa á komandi dögum eins og lengi blundað eldfjall.   Gunnar minnist á þöggun og veit ég hana svo mikla að eyru manna eru minni í vestfjarðarfjórðungi en annarsstaðar.   Og áðmíráll, sammála, tími kjaftagangs er liðinn, nú er að ganga í fjöruverkin.

LÁ  

[Samúel Guðmundur Sigurjónsson (IP-tala skráð) 23.1.2011 kl. 12:07]

það er alltaf jafn grátbroslegt að lesa blogg manna um  kvótakerfið og vanþekkingu á því. Aldrei er rætt við sjómenn um kvótakerfið heldur einungis  útgerðarmenn sem eru búnir að selja sig margoft út úr því, en alltaf komið inn bakdyrameginn aftur  þú hlítur að vita það Lýður,  að smábátaveiðar voru frjálsar í kvótakerfinu og smábatarnir soguðu til sín bróðurpartinn af kvóta hefðbundna vertíðarflotans (þekki það af eiginn raun) þannig að hann lagðist nánast af. Smábátakerfið er algerlega komið á að ósk smábátaeigenda sem seldu sig útúr ''stóra'' kerfinu.  Dagakerfið  kom til að ósk þeirra sem seldu sig afram úr smábátakerfinu. þeir fengu að eigin ósk að breyta dögunum í  kvóta sem þeir seldu samdægurs.  Þá hélt ég reyndar að þessi vitleysa væri loks búinn  og það væri bara eftir að setja punktinn og loka alveg á milli þessara tveggja kerfa , stóra og litla . Nei Þá var ráðist aftan að sjómönnum og sett á fót Strandveiðikerfi  til  þess að skapa eigendum gömlu kvótalausu dagabátana smá aukapening.  því bátarnir þeirra voru verðlausir eftir að  þeir seldu kvótann af þeim. Strandveiðileyfið  var í fyrra verðlagt : andvirði báts  X 10 = bátur með strandveiðileyfi. Sagan sýnir að frjálsar strandveiðar leysa engan vanda, þær eru hrein  og klár aðför að atvinnu okkar, sjómanna.

það er alveg ljóst að vandi Flateyrar verður ekki leystur með kvóta  það veit allt meðalgreint  fólk. Vandi Flateyrar .1.  íbúar í Ísafjarðarbæ eru ekki búnir að átta sig á að ísafjörður, Suðureyri, Flateyri og Þingeyri eru sama bæjarfélagið og íbúar þessara byggða þurfa að fara að vinna saman, ekki kroppa augun hvert úr öðru. Þegar ég vann hjá Kambi 2003 2007 varð ég t.d. sterklega var við að Ísfyrðingum var mjög illa við þessa atvinnustarfsemi á Flateyri og fann henni allt til foráttu. 2.  er að yngra fólk vill ekki setjast þar  að. Lausninn á því er ekki að taka fiskvinnu frá einu þorpi og færa til annars.  Auðveldast væri að  lækka skatta á fólk á þessum svæðum bæði á fólk og fyrirtæki margt fleyra er hægt að segja um þetta , nóg að sinn. Rétt að taka fram að ég hef aldrei komið nálægt útgerð og hef aldrei átt kvóta og tengist engum kvóta eiganda.

ein spurning, væri ráð til að fjölga læknum á landsbyggðinni að taka lækningaleyfið af öllum læknum og dreifa leyfunum  á sveitafélöginn, láta svo læknanna bjóða í þau. þetta verði svo gert á fimm ára fresti til að nýir læknar eigi möguleika á að komast að og tryggt sé að allir eigi sama rétt á að komast að hvar sem er á landinu