GÖSPUR GRÍMS & SIGURJÓNS

Flest höfum við gasprað og bassaleikari hljómsveitarinnar Grjóthruns (í Hólshreppi), Grímur Atlason, sannlega engin undantekning.  Gaspur Sigurjóns, fyrrverandi þingmanns Frjálslynda flokksins, Þórðarsonar yfir gaspri Gríms Atlasonar í Fréttablaðinu er þó með meiri gösprum.   Sakar Sigurjón bæjarsjórann (fyrir utan bassaleikinn gegnir Grímur stöðu bæjarstjóra í Bolungarvík) um rangfærslur og staðreyndaviðsnúning, gengur reyndar lengra og segir Grím vinna á móti sínu fólki.  Kannski í hundahaldsmálum en ekki varðandi kvótaandstöðuna sem er honum jafn sönn og Sigurjóni.  Í þeim málum eru þeir samflokksmenn og bendir Grímur á í grein sinni að atvinnuréttur sjávarbyggðanna sé algjörlega fyrir borð borinn með núverandi skipan veiðistjórnunar og kerfið sérsniðið að sérhagsmunum útvegsmanna.   Telji Sigurjón Grím fara með rangfærslur má benda á fjölda manns sem er honum sammála, þ.e. bæjarstjóranum.   Málflutningur frjálslyndra nær færri eyrum, meira að segja í sjávarbyggðunum, en málflutningur sjálfstæðismanna og kannski umhugsunarefni hvert skal sækja fylgið.  Að úthúða eina bæjarstjóranum á landinu sem þorir að greina frá tilvistarkreppu sjávarbyggðanna  og ekki undir rós er ómaklegt og óvænlegt til árangurs.  Sigurjón, hamraðu á hinum villuráfandi en ekki á skoðanabræðrum og systrum.

 LÁ

Athugasemdir

[Sigurjón Þórðarson, 23.5.2007 kl. 21:08]

Grein Gríms var full af rangfærslum um kvótakerfið s.s. um að það hafi aukið verðmætasköpun og í því væri falið eitthvert frelsi í sjávarútvegi.  Þessar rangfærslur verða ekkert réttari þó svo  fleiri en Grímur haldi þeim vitleysum fram.  Það sýna einfaldlega gögn Hagstofu Íslands sem ég vísa í á blogginu mínu.

Mér finnst sanngjarnt að gera þá kröfu til bæjarstjóra Bolungarvíkur að hann kynni sér staðreyndir um þróun sjávarútvegsins á síðustu árum ef hann sér á annað borð ástæðu til þess að fjalla um atvinnugreinina.

Ég lít alls ekki á að ég hafi úthúðað bæjarstjóranum heldur bent með afgerandi hætti á að fullyrðingar hans um frelsi og aukna verðmætasköpun væru algerlega úr lausu lofti gripnar.

Hitt er svo annað mál að ekki langt síðan að  Grímur Atlason sá ástæðu til að uppnefna liðsmenn Frjálslynda flokksins og saka þá um einhverja fenjamennsku.

[Lýður Árnason, 24.5.2007 kl. 03:21]

Sæll, Sigurjón. 

Ég spyr 10 aðila um frelsi í núverandi fiskveiðistjórnunarkerfi og fæ 10 mismunandi svör.  Sama gildir um verðmætasköpunina, menn legga saman 2 og 2 og fá út 5, 10, milljón eða skrilljón.  Fólk gefur sér mismunandi forsendur og útkoman eftir því.  Við deilum hinsvegar sömu sýn varðandi lífsafkomu sjávarbyggðanna og hefur þín framganga verið sérlega skelegg.  Þið Grímur megið vitanlega munnhöggvast eins og þið viljið mín vegna, að mínum dómi er þeim tíma þó illa varið.  Alvarlegast í þessu máli núna er afsláttur samfylkingarinnar í sjávarútvegsmálum, í stjórnarsáttmálanum er hann algjör og blessun Ingibjargar ávísun á enn frekari hremmingar.  En á meðan sjálfstæðismenn sitja í stjórnarráðinu verður engu breytt í stjórn fiskveiða, svo mikið er víst. 

Með kveðju,

LÁ

[Sigurður Þórðarson, 29.5.2007 kl. 01:31]

Það eru tveir flokkar við stjórn. Er ekki ósanngjarnt Lýður, að kenna bara Sjálfstæðisflokknum um?  Ég minni á að ISG hefur á LÍÚ þingi, í blóra við gamlar flokkssamþykktir, lýst yfir stuðningi við kvótakerfið, vel að merkja, fyrir daga núverandi ríkisstjórnar. 

[Lýður Árnason, 29.5.2007 kl. 03:08]

Sæll, Sigurður. 

Er engan veginn að kenna bara Sjálfstæðisflokknum um andvaraleysi í fiskveiðistjórnunarmálum.  Á hinn bóginn er ljóst að umræddur flokkur gaf margt frá sér í nýafstaðinni ráðherraskiptingu en hélt sjávarútvegsmálunum.  Því tel ég ljóst að sjálfstæðisflokkurinn leggi ofuráherslu á óbreytta stefnu í þessum málum og engu verði hnikað meðan hann situr.   Sjálfstæðisflokkurinn er hornsteinn kvótakerfisins, aðrir flokkar leggja sín þyngstu lóð á önnur mál að frjálslyndum undanskildum.   Þannig er nú það. 

 LÁ