Á SJÓ

Sjóferðinni er lokið, metafli dagsins, dýrindis veður og brottkast ekkert nema hland áhafnarinnar.  Bæjarstjórinn reyndist hamhleypa til vinnu of verkaði 5 tonn á eigin spýtur sem gróflega má áætla þúsund fiskar.  Kvótakerfið fékk endanlega falleinkunn og sé eitthvert vit í ráðamönum verður næsta fórnarlamb framþróunarinnar togveiðin sem alls ekki ætti að fyrirfinnast innan 50 mílna.  Smábátaveiði eins og þessi er í öllu tilliti séð hagkvæmnin sjálf, stofnkostnaður, hráefni, áhöfn, vinutími, landvinnsla, náttúra, allt er þetta öllu framar.   Ég segi:  Út með aflamark og inn með sóknarstýringu, því fyrr því betra.   

LÁ

Athugasemdir

[Heiða Þórðar, 9.6.2007 kl. 22:04]

Ekki reyna að telja fólki trú um, að ekki hafi leynst einsog eitt stk. lamba- eða hrafnasparð með í brottkestinu....

[Sigurgeir Jónsson, 11.6.2007 kl. 09:44]

Sóknarstýring var við lýði í þrjátíu ár hér á landi.Hverskonar sóknarstýringu vilt þú Lýður, þú verður að skýra þetta betur.Þú talar um smábáta Fulltrúar snábátaeigenda á Vestfjörðum tala ekki fyrir sóknarstýringu á þingum Landsambands Smábátaeigenda.Enda er það eðlilegt þeir hafa fjárfest í kvóta eftir að þeir voru skikkaðir inn í kvótakerfi.Það er ekki hægt að snúa til baka enda vilja það engir sem starfa í sjávarútvrgi.Þeir sem láta hæst eru gjaldþrota útgerðarmenn sem fengu úthlutað kvóta en kunna ekki að sjá fótum sínum forráð.Og ríkisstarfsmenn sem vilja að ríkið hirði kvótann og hann fari á uppboð.Það dræpi alla fiskvinnslu á Vestfjörðu endanlega.Fiskvinnsla á Vestfjörðum getur aldrei keppt við fiskvinnslu á suðurnesjum eða á Eyjafjarðar.svæðinu vegna nálægðar þessara svæða við flugvöll.

[Lýður Árnason, 12.6.2007 kl. 01:43]

Sæll, Sigurgeir og takk fyrir athugasemdina, hér fylgir svar. 

Ég myndi vilja sjá dagróðrarkerfi smábáta, 15 daga í mánuði þar sem grunnmiðin yrðu nýtt (30-50 mílur) með krókum og línu einungis.  Samhliða færa ákvörðunarvald um veiðimagn í auknum mæli til byggðanna sjálfra. 

Umræðan snýst mikið um fjárfestingar útgerðarmanna og/eða smábátasjómanna og skiljanleg þeirra sjónarmið enda hafa þessir aðilar beinna hagsmuna að gæta.   Ég er ósammála þeirri fullyrðingu þinni að fólk starfandi í sjávarútvegi vilji ekki breytingar og margir láta hátt um þessi mál sem aldrei hafa komið nálægt veiðum eða fiskvinnslu hvað þá orðið gjaldþrota.  Líka á öndverðum meiði að ríkisstarfsmenn sé forgöngumenn þess að ríkið hirði kvótann og selji hann á uppboði.  Sérlega er ég þó ósammála að samkeppnisstaða vestfirðinga sé vonlaus vegna flugvallarleysis sem ekki einu sinni er.  

Hagkvæmni útgerðar hér á vestfjörðum er augljós.  Það sem stendur henni fyrir þrifum og reyndar allri útgerð á landinu er sá klafi sem kvótaframsalið er orðið.  Arðsemiskrafan er þvílík að einungis í þeim hreiðurstæðum sem fyrir eru er möguleiki á ungum.   Og þeim fer óðum fækkandi.