ILLUR FYRIRBOÐI

Ætlaði varla að nenna boltaleiknum í kvöld, bjó enn að velgengni síðustu viku og fann aukreitis fyrir illum fyrirboða varðandi kvöldið.  Þráeggjan bæjarstjórans fær þó enginn staðist og bílfyllir varð.  Dottaði á útleiðinni enda hafnarmál Bolungarvíkur óhugstætt umræðuefni.   Liðum var skipað, Bolungarvík gegn Ísfirðingum og flautan gall.  Strax á 1stu mínútunum var ljóst hvert stefndi, hver sjálfgabbhreyfingin rak aðra og fór skipherrann fremstur.  Glappaskot í stengur og slár, inn í mark andstæðinganna vildi boltinn ekki og keyrði um þverbak þegar bæjarstjórinn sakaði mig um einleik, maður sem kveðst félagslega þenkjandi en mætir þó aldrei fyrr en hljómsveitin er búin að róta.  Eftir aldreiséðafyrr  sirkustilburði skipherrans á lokamínútunni sem færði andstæðingunum enn eitt markið gekk ég að boltanum og sprengdi hann.  Enginn fékk sér ís og á heimleiðinni hvíldi drungi yfir mannskapnum.  Í hefndarhug vegna einleiksásökunarinnar  tjáði ég bæjarstjóranum að bassamagnarinn hefði laskast í flutningum helgarinnar.  Sem betur fer vorum við komnir að Ósvörinni  og ekki ýkja langt að labba....

Athugasemdir

[Grímur (IP-tala skráð) 15.11.2007 kl. 09:17]

Allt satt nema þetta með rótið. Ég róta lang oftast - bara ekki þegar er hrun.

[Spákonan á Kambinum (IP-tala skráð) 15.11.2007 kl. 22:58]

Greinilegt var að hann rótaði ekki sl. laugardagskvöld :)  Enda hin flottasta veisla og ballið frábært :) Takk fyrir okkur fyllibytturnar frá Kökunni :)

[Skipherrann (IP-tala skráð) 16.11.2007 kl. 18:43]

     Ég legg það til að við ráðum okkur íþróttasálfræðing fyrir næsta fótboltakvöld. Ég þvertek fyrir það ,að þetta sé allt mér að kenna. Liðsandinn er í molum en andi sjálfhverfunnar svífur yfir salnum. Líkurnar á að ég fái boltan frá sumum samherja minna, er minni en ef ég væri að spila á móti þeim. Ég hef ákveðið að snúa mér alfarið að sjálfsmörkum og sjálfsgabbhreyfingum ef ástandið lagast ekki!!!                                  Virðingarfyllst.  Skipherrann.

[Lýður Árnason, 17.11.2007 kl. 05:13]

Kafteinar eiga að þola ágjafir og varðandi uppástungu um íþróttasálfræðing minni ég skipherrann á grunnmenntun bæjarstjórans.

[Skipherrann (IP-tala skráð) 17.11.2007 kl. 12:08]

Frábær hugmynd Lýður. Látum vandamálið, leysa vandamálið. Menn notuðu þessa aðferð oft hér áður fyrr og réðu mestu óeirðaseggina í dyravörðslu. Og ekki má gleyma 803 vikna reynslu hans í naflaskoðun.

[Þroskaþjálfinn (IP-tala skráð) 17.11.2007 kl. 19:20]

Láta vandamálið leysa vandamálið? Hvusslags vinir eru þetta? Ég geri orð meistarans að mínum: Svo skal böl bæta að benda á eitthvað annað....Nú eða eins og hann sagði líka: Í höfuðborgarsoranum þar á sín ætt og óðöl þessi ónytjungur....

[Lýður Árnason, 18.11.2007 kl. 04:57]

Kannski ætum við að leysa þennan boltasperring með því að skipta yfir í badminton en líkast á Helga Vala kollgátuna með höfuðborgarsorann, þar er rót vandans.