LÍKINDI & ÓLÍKINDI SJÚKDÓMA

Kári Stefánsson, einn okkar magnaðasti vísindamaður, selur fólki nú líkan sem reiknar líkur á sjúkdómum ýmiskonar.   Einhverjir fárast yfir tiltækinu og trúa sérlega illu upp á tryggingafélög.  Enda má vera að slík fyrirtæki noti eða misnoti þetta nýja aðgengi, krefjist þess jafnvel í tryggingamati sínu.   Tíminn mun leiða það í ljós.  Almenn nytsemi þessa líkans er hinsvegar umhugsunarverð.   Allar líkur eru dauði, miklar líkur kvíði, helmingslíkur gagnslausar, litlar líkur tryggja ekkert, engar líkur ekki til.   Í samantekt er útkoman áfram sama óvissan.  Það eina sem stendur 100% er dauðinn, undan honum kemst enginn, ekki einu sinni Bill Gates.  Hinn vængur þessa reiknilíkans er tilgangurinn.   Jú, kannski getur einhver forðast líklegan sjúkdóm eða gert hann vægari með breyttum lifnaðarháttum, aukin vitund getur hugsanlega ýtt við fólki og eigin eftirliti.  Svo má líka snúa þessu á hinn veginn og áætla að litlar líkur sjúkdóma auki kæruleysi fólks.   Mín reynsla er sú að fólk hafi almennt of miklar áhyggjur af sjúkdómum, pæli of mikið í sjúkdómum og búi til of mikið af sjúkdómum.  Heilbrigðisstéttir draga sízt úr þessari vaxandi tilhneigingu enda hverri stétt eiginlegt að viðhalda sjálfri sér.  Sem söluvara er reiknilíkan Kára angi af þessu og mun líklega valda meira álagi á heilbrigðiskerfið en minna.   Hinn tvíhöfða þurs, framboð og eftirspurn, ræður þó öllu að lokum og vilji fólk nýta fé sitt og tíma í þessar líkindapælingar, þá það.

 

 

 

 

 

 

 

 

 

 

 

 

Athugasemdir

[Katrín, 21.11.2007 kl. 17:54]

Man eftir viðtali við konu sem lét taka af sér bæði brjóstin og legið þar sem líkur voru á að hún fengi krabbamein í þessi lífæri. hvort það voru allar líkur eða litlar fylgdi ekki sögunni.  Hvað skyldi hún hafa gert ef líkur á heilablæðingu hefðu verið allar, miklar, litlar og tala nú ekki um líkur á kransæðastífu....fjarlægt heila og hjarta???

[Lýður Árnason, 22.11.2007 kl. 02:10]

Þetta er auðvitað böl hvers og eins nema krafan verði á hið opinbera, að það borgi brúsann, þá er þetta byrði borgaranna.  Í samantekt eru allt of margir svo sjúkdómahræddir að heilbrigðið gleymist, það er sorglegt.