HESTEYRI FRAMTÍÐARINNAR

Brotthvarfi Gríms Atlasonar var mótmælt með friðsamlegum hætti í morgunsári þessa napra norðanbálsdags.   Ekki þarf að dvelja lengi í Bolungarvík til að sjá að ætt, staða og stétt lita bæjarfélagið sterkum litum.    Hefðin er hér í hávegum og dínóar eins og sautjándi júní og sjómannadagur lifa enn góðu lífi.  Einnig er kirkjusókn yfir meðallagi miðað við bílafjöldann á sunnudagsmorgnum.    Þorrablótið þarf vart að nefna enda landsþekkt fyrir fastheldni.  Sama má segja um einkaframtakið sem birtist bæði í kökugerð og kerruakstri og ekki sama hvaðan gott kemur.  Telja sumir það reyndar  raunverulega ástæðu sambandsslitanna í bæjarstjórn.   Samfylkingin heldur reglulega umræðufundi og situr við orðin tóm en sjallarnir éta kanadískan humar fyrir luktum dyrum og svíkja engan.    Hommar fyrirfinnast ekki í bænum en Páll Óskar fær að koma í heimsókn á árlegum markaðsdegi.  Skal tekið fram að sá dagur er ekki í ástarviku.   Loðnubræðsla er í bænum en engin málmbræðsla.  Járnhraukar spóka sig hinsvegar víða en engin loðna.   Nóg er af öðrum fisktegundum en það kemur auðvitað engum við.   Bolungarvík er Hesteyri framtíðarinnar og brátt mun kirkjunni verða rænt og hún færð á tjarnarhólmann í Reykjvík.   Þar munu sitja komandi pólítíkusar blaðskellandi, blindfullir og hlusta á Grím hrópa edrú einn manna:  "Þessum vitleysingum  var nær, þessum helvítis vitleysingum var nær". 

Athugasemdir

[Guðmundur Sigurðsson (IP-tala skráð) 26.4.2008 kl. 05:56]

Klárlega mun smásálaháttur öfundarinnar færa Bolungarvík aftur á bak.  Þessi uppákoma í Víkinni er samt eitthvað sem ekki þarf að koma á óvart, eiginlega er þetta lýsandi fyrir það sem að er á staðnum. Þrándur kallinn í Götu kemur víða við á ferð sinni um óravíddir aulaháttar.

[kona þó ekki svona kona... (IP-tala skráð) 26.4.2008 kl. 17:36]

Það er alltaf ein kona í hverju plássi - og það þarf ekki meira. Ein svona.. kona... sem smitar allt og eitrar...

... held reyndar að í ykkar tilfelli séu þær tvær.... svona konur... það verður fróðlegt að fylgjast með.