SJÁLFSKIPAÐIR MANNVINIR

Hispursleysi er fátítt í kastljósi fjölmiðla.  Þar er tilhneigingin sú að tóna allt niður og vera eins óafgerandi og kostur er.  Fáir vilja klúðra metorðaklifrinu með afdráttarlausum fullyrðingum um viðkvæm málefni og eldfim.  Í eldhúsum landsmanna og kaffihúsum er þessu einatt öfugt farið.  Þar er fólk digurbarkalegt og opinberar oft sinn sanna hug.   Og í kjörklefanum ríkir þessi eldhús- og kaffihúsastemmning, þar krossa menn ekki eftir annarra forskrift heldur eigin.   Þetta ætti Frjálslyndi flokkurinn að hafa í huga þegar hann matreiðir stefnuskrá sína í komandi kosningum.  Ótækt er að geta ekki haft meiningar í málum innflytjenda og flóttafólks sem ekki samrýmast vinsældaharki.  Fjölmargir íslendingar vilja fara varlega í málum innflytjenda og flóttafólks.  Mýmörg dæmi um vankanta í þessum málaflokki réttlæta algjörlega umræður um þessi mál.   Varnaglar í garð flóttafólks er einnig sjónarmið og þarf ekki að byggjast á andúð eða illindum í garð þessarra hópa.  Aðferðafræði þeirri sem mjög er brúkuð til að kæfa umræðuna á hinsvegar ekki að hræðast heldur hrinda.   Upphrópanir og gjamm um kynþáttahatur hittir marga fyrir sem voga sér að íhuga þessi mál og komast að eigin niðurstöðu.   Kannski okkur öll.  En mannvinir eru aldrei sjálfskipaðir nema kannski hjá samfylkingunni.

LÁ

Athugasemdir

[Helgavalan (IP-tala skráð) 15.5.2008 kl. 23:50]

Ertu með þessu að lýsa yfir stuðningi við Magnús Þór Hafsteinsson, varaformann þinn? Ertu hrifinn af hans málflutningi?

[Lýður Árnason (IP-tala skráð) 16.5.2008 kl. 01:55]

Nei, dúllan mín.

Sjálfum finnst mér Akraneskaupstaður eigi að taka á móti flóttafólkinu og ekki líta á það sem bagga heldur tækifæri beggja.   Ég styð MÞH því ekki efnislega.   Hinsvegar þurfa menn ekki að vera kynþáttahatarar sem hafa aðra skoðun og málflutningur sem gerir ráð fyrir að ekki sé hægt að aðskilja þetta finnst mér villandi og vondur.

LÁ