ER NAUÐSYNLEGT AÐ SKJÓTA ÞÁ?

Mörgum hryllir við þeirri ákvörðun sjávarútvegsráðherra að gefa skotleyfi á hvali enn á ný.   Ferðamannabransanum er ekki skemmt og segir meiri hagsmunum fórnað fyrir minni.  Sumir myndu umorða þetta á þann veg að þeirra hagsmunum væri fórnað fyrir annarra.  Ísmaðurinn telur ónýttar dýrategundir almennt tilgangslausar og hræsni að amast við veiðum annarra en fara síðan heim og éta lambið sitt.  Hvalinn skjótum við í sínu náttúrulega umhverfi og dauðastríðið nokkur andartök en kjúklingar ala sína önn alla í útrýmingarbúðum og sjá aldrei ljósið nema í dauðanum.   Hrefnur eru ekki taldar í útrýmingarhættu og veiðar í atvinnuskyni ættu því að geta dafnað samhliða hvalaskoðun.   Náttúruvernd er þörf en þarf aðgreiningu frá tilfinningaöfgum.   Á sama hátt er lítið vit að stunda hvalveiðar í atvinnuskyni nema arður sé af.   Mig undrar þó mest hvílíka athygli einmitt þessi ákvörðun sjávarútvegsráðherra hlýtur því hún er langt í frá sú vitlausasta.

LÁ

Athugasemdir

[Níels A. Ársælsson., 21.5.2008 kl. 07:56]

Sammála.

Sérstaklega þykir mér síðasta setningin góð !

[Guðrún Jóna Gunnarsdóttir, 22.5.2008 kl. 01:02]

Ekki man hver ársskammtur hvers dýrs er af fiski, einkum loðnu og þorski en gott ef ég heyrði ekki töluna milljón tonn í útverpinu í dag.  Getur það verið

Dýrin talin vera um 44 þúsund á okkar miðum  og heimildin nær yfir 40 dýr. Útrýmingahætta? 

[Lýður Árnason (IP-tala skráð) 22.5.2008 kl. 02:22]

Sæl, Guðrún Jóna og takk fyrir Vestmannaeyjaárin, þau voru frábær.

Ekki veit ég hvað hvalir éta nákvæmlega mikið en stefnan í sjávarútvegsmálum étur allt sem að kjafti kemur, fisk, hús, peninga og fólk.   Svo mikið er víst.

LÁ

[Hrefna (IP-tala skráð) 24.5.2008 kl. 19:07]

Við 44.000 hrefnur:  
Hvað éta hvalir mikla fæðu? Talið er að hver hvalur éti um það bil 2-4% af þyngd sinni á dag. Ef við reiknum með því að hver hrefna við landið éti 3% af þyngd sinni á dag og hrefnurnar séu 43.000 í kringum ísland, þá er heildar fæðan um það bil 9.030 tonn á dag af fæðu. Þetta er miðað við að hrefnan sé að meðaltali 7 tonn, en hrefna er oftast á bilinu 5 - 10 tonn á þyngd. Á ársgrundvelli þýðir þetta að bara hrefnustofninn í kringum landið sé að éta tæpar 1,8 milljónir tonna af fæðu á ári miðað við að hrefnan sé hérna í 200 daga á ári.