LJÓS Í MYRKRI.

Skerpast nú línur hratt í íslenzkri pólitík enda uppgjör óumflýjanlegt.  Skoðanakönnun er að líkum, framsókn sýpur mjög seyðið af einu stærsta óláni íslenzka lýðveldisins, fyrrum formanni og frjálslyndir hafa róið á mið sundurþykkju sem eðlilega beinir fólki annað.  Samfylkingu vex fiskur um hrygg þrátt fyrir stjórnarsetu og það í mestu kollsteypustjórn lýðveldisins.  Enginn þar á bæ bjó yfir skyggnigáfu né afli til afstýringar á þeirri efnahagshrollvekju sem rétt er að byrja.   Því má klóra sér í hausnum yfir góðu gengi þar á bæ.   Vinstri grænir hafa sopið hveljur og bent á ýmislegt sem nú er í hendi.   Varnaðarorð þeirra teljast nú til tekna og með velmælandi forystumann eru þeir til alls líklegir.  Sjálfstæðisflokkurinn er í flestra hugum  bílstjórinn sem rútunni valt og fylgistap skýrist af því.  Krafa almennings nú er ný hugsun og nýtt fólk.   Undirtektir á hinum pólitíska vettvangi hafa hinsvegar verið dræmar og ekki að sjá nema megnið ætli að sitja áfram.  Efnahagsbandalag Evrópu verður bitbein næstu kosninga en í því felst kærkomið sóknarfæri fyrir sjálfstæðismenn enda margir andvígir aðild sem hugnast ekki bakborðinn.  En þó yfirlýst leiðtogaefni flokksins myndu sóma sér vel í hvaða Hollywoodmynd sem er hafa bæði skaðast á ótæpilegu sviðsljósi útrásar og einkavæðingar.    Sjálfstæðisflokkurinn á þó augljóslega eina vonarstjörnu sem nýtur lýðhylli.  Á ég þar við borgarstýruna sem náð hefur góðum tökum á viðfangsefni sínu.   Sjálfstæðisflokkurinn með Hönnu Birnu í brúnni gæti hugsanlega verið álitlegur kostur fjölmargra íslendinga sem vilja nýja hugsun, nýtt fólk, ekki of mikla vinstri slagsíðu og varnagla við ESB.  

LÁ

Athugasemdir

[Jón Steinar Ragnarsson, 27.10.2008 kl. 03:07]

45% tóku ekki afstöðu Lýður. Pældu í því.  Þýðir að meta flokkslínur út frá því? Þetta er alger vantraustyfirlýsing á íslenska stjórnmálamenn. Alla.

Ekki gott fyrir þjóð, sem vill byggja allt sitt á lýðræði er það?

Vonandi stígur þetta ekki til höfðuðs á Samfylkingunni svo þeir slíti stjórnarsamstarfinu og boði til kosninga mitt í öllum látunum. Það væri svosem eftir svo sjálfmiðuðum tæifærissinnum.

Annas skemmtileg grein eins og endra nær.

[lydur arnason (IP-tala skráð) 27.10.2008 kl. 03:55]

Reyndar rétt hjá þér,  Jón Steinar, nær helmingur tók ekki afstöðu.  Það skyldi þó ekki vera ávísun á nýja breiðfylkingu?   Loksins myndu sumir segja.  

LÁ