PÚÐUR.

Púðursnjór.   Loksins sýnir Klakinn sitt rétta andlit, afgerandi og ekkert hálfkák.   Yfir Grímsbrú liggur mín leið, fylgi hundinum upp í kirkjugarð.  Þar er lítið að hafa í frosthörkunni en í rótum Grjóthrunshlíðar spásserar gamalær, filé vafið í ull.  Aldurinn sést á augunum sem ranghvolfast ekki eins og í yngra fé.  Andspænis hundinum og mér stendur ærin keik, hverfur svo inn í bylinn.   Á bakaleiðinni glittir í neonljós kreppusamfélagsins.  Andsvarið, að elta rolluna, kemur upp í hugann en hundurinn baksast ólmur til siðmenningarinnar.  Þó komið sé fram á nótt bjarma skjáir í húsgluggum.   Tvíburrarnir orðnir hvítir og trampólín skjögra í garðshornum.   Í nótt mun velmegunin hverfa eins og bankaleynd undir hvíta ábreiðu hins andlega seims.    Hundurinn skilar sínu þó bæjarstjórinn sé kominn annað og skiptir víst litlu í ofankomunni.  Ráðhúsið segir sex í mínus og klukkan stopp.  Hræddur um að mínusinn sé vantalinn þar sem ég leita skjóls undir vegg félagsheimilisins.   Klukkan er hinsvegar rétt.    Renni mér á hafnarvigtina enda hvergi léttari og skauta áfram að næsta vegg.  Sjávarútvegsráðherra, hvurs afi bjó hér.  Sá myndi nú snúa sér í gröfinni ef hann vissi.   Meiri púðursnjór.   Bjánaskapur að arka svona lengi undan vindi.  Hundurinn vissi betur og löngu kominn heim.   Eftirbátur hans geng ég kreppunni í mót.

LÁ    

Athugasemdir

[Breyzkur brjóstsykur (IP-tala skráð) 27.11.2008 kl. 09:19]

Allt fram streymir endalaust nema klukkan í Bolungarvík....og reyndar í flestum hornum þessa lands. Snillingarnir lengi lifi, húrra!

[Helgavalan (IP-tala skráð) 27.11.2008 kl. 09:28]

Takk.. heilsa og sjáumst fljótt.

[Væla Veinólína (IP-tala skráð) 10.12.2008 kl. 11:13]

Til hamingju með daginn um daginn elsku kallinn minn!

Verðum að fara að heyrast og sjást!

Kv. Vigdís. :)