HVALVEIÐISKOÐUN.

Umdeild ákvörðun fráfarandi sjávarútvegsráðherra hrellir marga.  Reyndar hefur fátt frá honum komið óhrellandi.   En ákvörðun hans varðandi hvalveiðar er röng þó hún sé rétt.  Vitanlega á að nýta auðlind sé hægt að selja hráefnið  samhliða því að vera  skynsamlegt út frá náttúruverndarsjónarmiðum.   Veiðitegundir hér við land eru ekki í útrýmingarhættu.    Einnig skil ég ekki hvers vegna veiði og hvalaskoðun geta ekki farið saman.    Ferðamannastraumurinn er vaxandi og ekki að sjá að slíkir velti hvalveiðimálum íslendinga mikið fyrir sér.  Það sem hinsvegar gjaldfellir þetta sporðakast ráðherrans eru vinnubrögðin, að nenna og vilja binda hendur eftirmanna sinna.   Því ber að hnekkja þessari ákvörðun þó ekki væri nema til annars en að taka hana aftur.

LÁ

Athugasemdir

[Steingrímur Helgason, 30.1.2009 kl. 01:38]

Þetta er náttla uppalinn Bolur í vík.

En sem 'kvalaunnandi' tel ég rétt metið hjá þér að afsetja & taka aftur.

"Stjórnmálaleg réttmennzka"...

[Þórður Sævar Jónsson (IP-tala skráð) 30.1.2009 kl. 01:57]

100%   sammála þér.  Landbúnaðar og Sjávarútvegsmálaráðherra er algert viðundur í íslenskri stjórnmálasögu.

[Jón Valur Jensson, 30.1.2009 kl. 02:12]

Það væru ekki góð vinnubrögð hjá sjávarútvegsráðherra að láta þá miklu vinnu, sem farið hefur í góðan undirbúning þessa máls, fara forgörðum bara af þeirri ástæðu, að einhver umboðslaus minnihluta-bráðabirgðastjórn ætlar að sitja hér um þrjá mánuði. Þessi ákvörðun Einars abbar ekkert upp á þessa yfirvofandi vinstristjórn, af því að engir hvalir verða fangaðir á hennar valdatíma.

Hvalveiðarnar eru afar mikilvægar fyrir okkur Íslendinga og andstaða vinstri flokksbroddanna til háborinnar skammar. Okkur er mest alls þörf á atvinnu og tekjum í þjóðarbúið og höfum ekki efni á því að varpa á glæ tækifærinu til að afla 5–6 milljarða króna virði í hvalafurðum á ári hverju og veita 2–300 manns góða vinnu. Hef ég ritað um þetta mál eftirfarandi greinar á Vísisbloggi mínu:

Bezta frétt dagsins: hvalveiðar leyfðar næstu 5 árin (27. jan.)

"Þetta eru aular, Guðjón" : eintómir lúserar í nýrri ríkisstjórn? (28. jan.).

Hvalveiðar? Já, að sjálfsögðu nýtum við þann rétt okkar (skr. í fyrrinótt).

PS. Er þetta ekki einfaldlega flokksvarðgæzla hjá ykkur Þórði að skrifa svona?

[Þórður Sævar Jónsson (IP-tala skráð) 30.1.2009 kl. 09:49]

Ég vil biðja hæstvirtan Sjávarútvegsráðherra afsökunar á ummælum mínum hér að ofan.  Þau voru algerlega ástæðulaus og ekki sannleikanum samkvæm.

[Offari, 30.1.2009 kl. 12:13]

Góður Þórður það er vissulega hætta á að menn missi út úr sér orð sem menn sjá síðar eftir í þessu óstandi. Það þarf ekkert að skammast sín fyrir að biðjast afsökunar á orðum sínum. Fólk er einfaldlega með mismunadi skoðanir og ég efast um að lífið væri skemmtilegt ef allir væru eins.

[lydur arnason (IP-tala skráð) 30.1.2009 kl. 12:33]

Sæll, Jón Valur og þakka marga beinskeytta pistla.  Er efnislega sammála hvalveiðum séu þær hagkvæmur atvinnukostur og náttúruvænn.  Þú segir, flokksvarðgæzla en hvurs?   Vinnubrögð ráðherrans, að binda hendur eftirmanna og þá ekki næstu 3 mánuði heldur næstu 4 ár tel ég röng.   Reyndar líkur á að næsti eða þar næsti ráðherra ákvarði í sömu veru.   Við þurfum tekjur og strax.  Vil hinsvegar endilega að fyrirkomulagi fiskveiða verði breytt í heild sinni en það er annar handleggur og lengri.

Þórður!  Stattu við það sem þú skrifar og viljirðu biðja afsökunar á einhverjum ummælum, biddu þá afsökunar á leiðréttingunni.

Kveðja til ykkar beggja,

LÁ