AFTURGANGA DAVÍÐS.

Eina krafan sem eftir stendur á mótmælendur er stjórn seðlabankans burt.  Það hefur ekki gerst og óvissan enn mikil.    Ríkisstjórnin brást, fjármálaeftirlitið brást og seðlabankinn brást, eða hvað?  Hungur almennings eftir blórabögglum er skiljanlegt miðað við það sem á undan er gengið.   En afhverju Davíð?  Sjálfur varðist hann fimlega í kastljósviðtali í kvöld og reyndar gott betur, blés til sóknar.  Mörg atriði sem Davíð nefndi eru í rannsókn og munu eflaust upplýsast að henni lokinni.  Enda sögðu vísdómsmenn 2008 ár bankahrunsins en 2009 ár uppljóstrana.  Davíð skýrði mörg ásökunaratriði í garð æðstu manna seðlabankans prýðilega, m.a. bindiskylduna og gjaldeyrisforðann, einnig viðurkenndi hann að verðbólgustefnu bankans hafi verið ábótavant.  Viðvaranir seðlabankans voru greinilega margar og í tíma og sé útlistun Davíðs rétt má ljóst vera að ráðherrar fyrrverandi ríkisstjórnar og sömu þessarar eru í vanda.  Fleira málsmetandi fólk má búast við andstreymi séu bollaleggingar Davíðs varðandi fjárhagslega fyrirgreiðslu ýmiskonar réttar.   Hausar munu fjúka og sumir fagrir.  En þó Davíð sé í huga margra faðir einkavæðingarinnar, er réttlát að saka hann um skipbrot fyrirbærisins?    Davíð má saka um ólýðræðislega stjórnarhætti og einstrengingshátt á sinni valdatíð en er maðurinn krimmi?   Stór hluti þjóðarinnar hefur horn í síðu hans og ákveðinn hópur greinilega gert honum lífið leitt, bæði í vinnu og einkalífi eins og fram kom í kastljósviðtalinu.   Hann hefur því í mörgu stöðu sakbornings og sagði það raunar sjálfur í títtnefndu viðtali.    Komi í ljós að sannleikur Davíðs sé sá eini sanni er það gríðarlegur áfellisdómur yfir fjölmiðlum, mörgum ráðamönnum og ekki endilega bara hérlendis.   Brottrekstur Davíðs úr seðlabankanum er kannski neyðarbrauð ráðvilltrar þjóðar en verði svo sé ég enga leið færa fyrir manninn aðra en þá að ganga aftur.  Og sú afturganga verður fjölmenn.   

LÁ

Athugasemdir

[Falur (IP-tala skráð) 25.2.2009 kl. 13:12]

Hroki,hroki,hroki.Hvernig stendur á því að maðurinn segir ekki frá því sem hann veit?Ber honum ekki lagarleg skylda eða í það minnsta siðferðisleg að upplýsa þjóðina um hvað hann veit um hluti sem knésetti íslenskt bankakerfi og skuldsetti þjóðina svo að ráðast þarf á velferðakerfið. Það síðasta sem ég heyrði var að loka ætti fyrir þjónustu við fórnalömb nauðgana á landspítalanum. Það sem spara á í rekstri þess spítala er andvirði einnar einkaþotu eða íbúðar eins útrásarvíkings!!Afkvæmi einkavæðingahugsjóna hans og hans tindáta, sem berja sér á brjóst á fjölum alþingis í tilraun sinni til að telja þjóðinni trú um að þeir séu þeir einu sem geti stýrt henni út úr þessum ógöngum. Það grátlegasta við þetta allt er að ég held að þeim sé að takast það!!!!Þú segir að hann hafi skýrt bindiskilduna og gjaldeyrisforðann prýðilega en sagði hann eitthvað um það afhverju hann gaf bönkunum heilaskoðun í maí í fyrra eftir allar þær viðvaranir sem hann kveðst hafa gefið ríkisstjórninni um hið gagnstæða(þ.e.a.s. yfirvofandi hrun).Eiga baugsfeðgar erlenda fjöðmiðla líka? Ég man ekki betur en að hann hafi verið þeim vafasama heiðurs aðnjótandi að vera í hópi 25 manna sem þessi virti fjölmiðill taldi eiga mesta sök á þeirri kreppu sem er að ganga yfir heiminn.

[Falur (IP-tala skráð) 25.2.2009 kl. 13:16]

Byrjun athuasemdarinnar á ekki við þig Lýður.

[lydur arnason (IP-tala skráð) 26.2.2009 kl. 01:12]

Davíðsspjöll eru alltaf hrokafull og það á ekki að koma á óvart.  En útskýringar Davíðs eru hans hlið sem hefur lítið heyrst.  Brottvikning úr seðlabankanum hlýtur að vera vegna afglapa og auðvitað á maðurinn hafa sinn málsvarnarrétt þó vondur sé.  Samantekt á íslensku hagkerfi skal liggja fyrir í haust og þá vonandi fleiri kurl komin til grafar.   Dæmum eftir því en ekki upphrópunum.   Einkavæðingin mistókst, það er ljóst en sé það rétt að seðlabankastjórar hafi margsinnis varað fyrrum ríkisstjórn við hruni hljóta nokkrir núverandi ráðherra að falla einnig.   Finnst fyrsti hluti athiugasemdarinnar sérlega ósmekklegur og móðgandi.  Kveðja, LÁ