HEIÐURSMANNALAUN.

Þráinn Betelsson, nýkjörinn þingmaður borgarahreyfingar, hefur einatt verið snarpur í pistlum sínum og orðræðum gegn spillingu og ofurlaunum.   Yfirleitt hef ég verið honum sammála og samhliða notið kímnigáfunnar.  En nú er hann sjálfur í bobba.  Heiðurslaun listamanna eru umdeild enda erfitt að réttlæta slíkar fésporzlur til einnar atvinnugreinar fremur en annarar.   Þráinn þiggur nú þennan heiður sem er í aurum talinn 200.000 þúsund krónur á mánuði.   Margir hafa lagt að Þráni að afsala sér þessari dúsu meðan þingfararkaup er þegið, ekki sízt flokksfélagar.   Listamaðurinn stendur keikur á sínu og andmælir kröftuglega og bendir á þá sem verri eru.  Sem nýkjörinn alþingismaður búsáhaldabyltingar mun þessi afstaða ekki bara veikja ímynd Þráins heldur hreyfingarinnar allrar.   Hinn kosturinn myndi að sama skapi styrkja hvorutveggja.  Ég ráðlegg nýbökuðum þingmanni eindregið að yfirfara gildismat sitt og breyta samkvæmt því. 

LÁ

Athugasemdir

[Þórður Sævar Jónsson (IP-tala skráð) 4.5.2009 kl. 02:08]

Hvað er í gangi?  Ertu kominn í slag við vindmillur?  Eða hvað?  Ég sem meðreiðarsveinn þinn í gegnum tíðina, segi stopp....Hingað og ekki lengra. Ef þú villt gerast siðferðispostuli á þessum síðustu og verstu tímum.  Þá ættir þú að ráðast á garðinn þar sem hann er ögn hærri.....Ég vona, að Þráinn hafi ekki glatað skopskyni sínu þótt hann sé kominná þing....Nú ætti hann, að afsala sér þingfaralaununum og gefa andvirði þeirra til Lögreglukórsins

[lydurarnason (IP-tala skráð) 4.5.2009 kl. 08:11]

Sæll, Doddi, Koddi.  Siðferði er eðlismunur, ekki stigsmunur.  Siðgæðispostuli er ég enginn, bendi einungis á hvort mælistika hins nýbakaða þingmanns hafi breyst.  Pólitískir vinglar sveiflast með vindi og trúi ég því ekki upp á umræddan fyrr en í fulla hnefana.  Tillaga þín um afsal þingfarar á lögreglukórinn er hinsvegar stórgóð. 

LÁ

[Helgi Kr. Sigmundsson, 7.5.2009 kl. 02:10]

Þið hafið báðir nokkuð til ykkar máls!