TIL HVERS ÖLL ÞESSI LÁN?

Afhverju þurfum við öll þessi lán?  Ríkisstjórnir rugláranna gumuðu sýknt og heilagt um skuldlausa stöðu ríkissjóðs.  Sé það ekki enn ein lygin liggja a.m.k. ekki á okkur gamlar syndir.  Sömu ríkisstjórnir bentu á einkaneyzluna og lánin henni tengd og lífsstíll íslendinga sl. ára undirstrikar réttmæti þessara fullyrðinga.  En ekki eru lánin tekin til að borga skuldir heimilanna, er það?  Þá standa eftir óreiðumenn Davíðs.  Lánadrottnar gömlu bankanna hljóta að vilja endurheimta sitt lánsfé og fyrst gömlu bankarnir eru orðnir nýjir og í ríkiseigu sækja þessir aðilar væntanlega þangað.  En varla hafa ríkiskassar verið að lána gömlu einkareknu Íslendingabönkunum, það hljóta að hafa verið fjárfestingarstofnanir í einkaeigu eða fjársterkir einstaklingar.  Og þegar þessir aðilar hafa látið greipar sópa um þrotabúin, afhverju ætti íslenzka ríkið með lántökum að bæta því við sem upp á vantar?   Er það hlutverk íslenzkra skattborgara að sjá til þess að spákaupmenn og kaupahéðnar tapi ekki á fjárumsýslu sinni?  Sama má segja um ríkisskuldabréf og jöklabréf, hvers vegna er útleysing þessara fjármuna bara ekki skattlögð upp í rjáfur uns versti stormurinn er afstaðinn?   Vér íslendingar höfum engin ráð á einhverju alþjóðlegu vinsældaklifri, við þurfum að fá ráðrúm og til þess er besta byrjunin að hafna icesave og einbeita okkur að frystingu eigna auðmanna.   Endalaus lán til að styrkja gjaldeyrisforða eða önnur aurasöfn eru allt of dýru verði keypt og engu líkara en að evrópuþjóðirnar með hollendinga og breta í broddi fylkingar vilji ekki að Ísland nái sér á strik af eigin rammleik.  En það getum við og það mun ekki taka mörg ár ef við bara höfum vit á að að hafna þeirri þrælakistu sem að okkur er beint.

LÁ 

Athugasemdir

[Hans Haraldsson (IP-tala skráð) 31.7.2009 kl. 02:51]

Þetta er í raun furðulegt þegar maður hugsar um það.

Það er búið að tengja lánasúpu AGS saman við úrlausn efnahagsóreiðunnar í í svo mörgum fréttum að fólk virðist vera farið að gefa sér það fyrirfram að hún sé bráðnauðsynleg án þess að rökræðan um það hafi nokkurn tímann verið kláruð.

[Lýður Árnason, 31.7.2009 kl. 03:02]

Einmitt, Hans, manni er farið að langa verulega til að vita hvers vegna öll þessi lán eru svona bráðnauðsynleg, um það er aldrei rætt í hvað þetta allt á að fara, bara vexti og afborganir.   Kannski einhverjum óbærilegum sannleika sé leynt, hver veit?

LÁ

[Sigurður Þórðarson, 31.7.2009 kl. 06:19]

Flottur pistill hjá þér Lýður eins og oft áður.

Evrópuráðamennirnir hugsa bara um lán en að öðru leyti eru þeir lánlausir.

[E-físa (IP-tala skráð) 31.7.2009 kl. 08:28]

Af því að Bjartur skuldar pening!

[lydur arnason (IP-tala skráð) 31.7.2009 kl. 13:46]

Kæra Efísa....  Upplýstu þá nánar eða er það af því bara?

LÁ