ÞRÍRÉTTA MÁLTÍÐ.

Samkvæmt yfirlýsingum íslenzkra ráðamanna hangir ríkisstjórnin á bláþræði.  Ásakanir á hendur AGS eru farnar að heyrast úr öllum hornum, sjóðurinn sé innheimtustofnun breta og hollendinga en endurreisn Íslands sé aukaatriði.   Þetta hefur reyndar verið augljóst lengi en gott að ráðamenn séu loksins farnir að viðurkenna stöðuna.  Allt of mikill tími hefur farið til spillis.   Kosningar nú myndu litlu breyta enda staða kjósenda lík gesta á veitingastað sem langar ekki í neitt á matseðlinum.   Þrír kostir eru því í stöðunni:  Þjóðstjórn, utanþingsstjórn eða bylting.   Af þessari þrírétta máltíð er forrétturinn komin fram yfir síðasta söludag en reyna mætti aðalréttinn.  Smakkist hann ekki er bara að skella sér á desertinn.

LÁ

Athugasemdir

[Finnur Bárðarson, 3.10.2009 kl. 16:50]

Ég held ég drífi mig á annan veitingastað, ekki einu sinni Gordon Ramsey gæti bjargað þessum.

[Þórður Már Jónsson, 5.10.2009 kl. 23:21]

Tækifærið til að breyta fiskveiðistjórnunarkerfinu hangir á bláþræði, með eða án núverandi stjórnar sem þó er eina stjórnin sem gæti gert breytingar á því. Verði ekkert gert þá eru það hrein svik og ótrúlegur heigulsháttur. Ástandið er svo grátlegt að ef ekkert verður að gert þá langar mann helst til að flytja úr landi. Myndi líklega gera það ef menntun mín myndi nýtast mér fullkomlega erlendis.

[Lýður Árnason, 6.10.2009 kl. 02:05]

Stjórnarflokkarnir settu ESB í forgang og sá gjörningur herðist nú að hálsi ríkisstjórnarinnar eins og hengingaról.  Leitt að þetta gullna tækifæri til nauðsynlegra samfélagsbreytinga er að renna út í sandinn. 

LÁ