FISKISÖGUR EFLA ALLA DÁÐ.

Tveir valinkunnir vestfirðingar eru á öndverðum meiði hvort veiða skuli meiri þorsk við Íslandsstrendur.  Talin eru fram ýmis rök, með og á móti en í samantekt má segja að annar málsaðilinn treystir hafrannsóknarstofnun og vill fylgja ráðleggingum hennar en hinn opnar á fleiri möguleika.  Vísar m.a. til fiskifræðinga sem véfengja vísindi hafró og sjómanna sem segja miðin úttútnuð af fiski.  Við getum endalaust rifist um fiskivísindi og aðhyllst kenningar, við getum efast um hafrannsóknarstofnun og sagt hana vasagull LÍU, sömuleiðis treyst stofnunni og talið hana trúverðuga.   En yfirleitt er ágæt regla þegar vísindi eru tvíbend að fikra sig áfram.   Og í því árferði sem hér ríkir liggur beinlínis á okkur sú skylda að fullnýta miðin.   Tillögur um auknar veiðar í ákveðinn tíma er viðleitni í þá átt.  

Sjálfur tel ég íslenzku þjóðina ekki mótfallna slíkum áformum.  Annað gildir um hagsmunaaðila.   Úthlutun veiðiheimilda á nýjum forsendum yrði ekki mætt þegjandi.  Í ljósi boðaðra breytinga á fiskveiðistjórnunarkerfinu er þó vandséð hvernig annað ætti að vera. En hafi stjórnarflokkarnir ekki kjark til augljósra og nauðsynlegra breytinga í sjávarútvegi er spá mín þessi:   Afli verður aukinn þegar þau öfl ná aftur völdum sem vilja óbreytt tangarhald fiskimiðanna.   Þessi aukna veiði rennur til fyrirliggjandi kvótahafa og taka tvö á atvinnurétti sem er yfirveðsettur og gengur kaupum og sölum fer í gang.   Eini möguleikinn til að fyrirbyggja þá tímaeyðslu er að taka slaginn:  NÚNA!

 LÁ    

Athugasemdir

[Níels A. Ársælsson., 3.11.2009 kl. 10:56]

Sammála !

Eins og Þorgeir Hávarsson sagði svo fallega.

"Eigi skal velja frið ef ófriður er í boði".

[Þorður Sævar Jónssom (IP-tala skráð) 3.11.2009 kl. 13:06]

Hef aldrei getað lesið smáa letrið,  NÚNA segir meira en mörg orð.  Snilldar umsögn Nilla sannfærir mig um, að þú ert á réttu róli.

[Sigurgeir Jónsson, 3.11.2009 kl. 22:49]

Það er ekki þingmeirihluti fyrir ríkisvæðingu veiðiréttarins til R.Víkur. og verður aldrei.Menn geta látið sig dreyma um slíkt og látið slíkt standa í stjórnarsáttmála.Hitt er annað mál að frjálsar skötuselsveiðar eru í umræðunni eins og allir vita.En þær verða aldrei á vegum Ríkisins.

[lydur arnason (IP-tala skráð) 4.11.2009 kl. 01:55]

Agressívur aðmírállinn að vanda, Koddinn glöggur, Sigurgeir sannfærður.  Frjálsar skötuselsveiðar yrðu bara dásamlegar enda sá fitupúði ljúfmeti mikið.

LÁ