ÍGILDI VONAR.

Fugl er í húsinu.  Tittlingur.  Hundurinn fann greyið aðframkominn fyrir 10 dögum, blæðandi.  Kominn inn í hlýjuna hresstist fuglinn en ljóst að hægri vængurinn er laskaður.  Nú hefur hann skilað flugfjöðrunum og bíða yngri heimilsmeðlimir spenntir nýrra vaxtarbrodda.  Sjálfur kalla ég fuglinn Hólmstein og ætla báðum  flug með hækkandi sól.   Tittlingurinn mun því að líkum dvelja í bílskúrnum fram yfir hátíðar og það í góðu yfirlæti.   Reyndar hafa fleiri gist í skúrnum, síðast mús og þar áður hrafn.  Músin lifði, hrafninn dó.   Músinni var fengið nýtt heimili í yfirgefinni villu fyrrum bæjarstjóra en hrafninn var sannkallaður útrásarvíkingur og át yfir sig.   Fannst dauður með iðrin úti.   En á  tittlingnum, Hólmsteini, hef ég trú.  Hann mun braggast og svífa út í íðilfagra vornóttina  sem ígildi vonar.  

LÁ

Athugasemdir

[Helgavalan (IP-tala skráð) 12.12.2009 kl. 19:22]

Ég krefst þess að þú borgir fyrir leiguna hjá músinni, því hún neitar að borga. Hún segist ekki fá neinar húsaleigubætur vegna þess að hún er ekki með skráð lögheimili í Víkinni.

Það kemur til af því að fyrrverandi bæjarstjórinn er ekki lengur á vaktinni að smala fólki á útsvarslista og þess vegna er enginn í því... frekar en öðru... svo... kæri... það dæmist á þig að splæsa leigunni á skvísuna

[lydurarnason (IP-tala skráð) 12.12.2009 kl. 19:57]

Mun borga annaðhvort undir músina eða icesave og bíð nú spenntur eftir atkvæðisgreiðslunni.   Fari svo að icesavebakkinn verði þjóðarinnar veitir hann aðgang að ESB og þá er sjálfgefið að sækja um húsaleigubætur í sjóðina þar.  Þangað til gauka ég að henni Berlusconiostum og Scharkosypinnum.  Og einum og einum dropa af Gordon.

LÁ