SIÐFERÐILEG RÁÐVILLA Í BOÐI SAMFYLKINGAR.

Aumleg tilsvör iðnaðarráðherra varðandi gagnaver á Suðurnesjum var sláandi í Kastljósi kvöldsins.  Réttlæting aðkomu brennuvarga viðskiptalífsins var aumleg og ljóst að ekki er verið að taka afstöðu til grundvallaratriða.  Viðskiptatækifærinu má ekki sleppa sökum hagkvæmni og fyrst umræddir aðilar eru ekki í meirihluta er borð fyrir báru, hægt að horfa framhjá öllum sviðnu ökrunum.   Ætti meirihlutaeigendum að þessu gagnaveri ekki að vera í lófa lagið útvega aðra fjárfesta að þessu arðbæra verkefni?   Með þessu útspili er iðnaðarráðherra að spilla endurreisnarferlinu, menga það og óskýra á kostnað hvers?  Hvar liggja mörkin að hleypa að brennuvörgum, hvar er arðsemisstrikið?   Sökin í þessu liggur ekki hjá Novator heldur ríkisstjórn sem dælir misvísandi skilaboðum til þjóðarinnar.   Afleiðingin náttúrulega áframhaldandi siðferðileg ráðvilla, að þessu sinni í boði samfylkingar.

LÁ 

Athugasemdir

[Jakob Bjarnar (IP-tala skráð) 17.12.2009 kl. 12:13]

Þetta er algjört rugl í þér Lýður. Fyrir nú utan það að Bjöggi hefur ekki verið dæmdur fyrir eitt og neitt þá er það óðsmannsæði að ætla sér að fara að meta hvern og einn sem að viðskiptum við ríkið kemur á þeim forsendum hvort hann sé þóknanlegur eða ekki! Hver á að meta það? Og hvar á að setja línuna? Ættum við kannski að búa til 500 manna lista þar sem eru til dæmis allir sem störfuðu í banka 7 mánuðum fyrir hrunið og ef þeir einstaklingar koma að einhverju dílum þá er allt bú? Eða ættum við kannski að hafa hann 60 manna og þá 9 mánuðum fyrir hrun. Það hljóta að vera einhverjar almennar leikreglur í gildi.

[Þórður Sævar Jónsson (IP-tala skráð) 17.12.2009 kl. 20:50]

Ætli umhverfisráðherra hafi nú sagt sitt síðasta ???

[Lýður Árnason, 18.12.2009 kl. 03:25]

Þetta er þá rugl á rugl ofan, Jakob Bjarnar.  Ætli íslendingar sér viðskiptasamninga við aðila sem augljóslega eru ekki bara tengdir hruninu heldur nánast hrunið sjálft er hér engu til að dreifa.   Get verið sammála um vikmörk en tel engum vafa undirorpið hvoru megin umræddur aðili lendir.   Auk þess er leynd yfir orkuverði óásættanlegt, ekki sízt í ljósi fyrri yfirlýsinga, tengsl eins kaupandans við störf hjá iðnaðarráðuneytinu eru dásamlega í anda fyrri ríkisstjórna og frávik skattalega frá eins og þú réttilega nefnir "almennum leikreglum" er ólíðandi.  Auk þess er hlálegt fyrir ímynd þjóðarinnar að alþingi samþykki skuldbindingar icesave samtímis því að semja við sjálfan óreiðumanninn.   Þetta á eftir að kosta þennan óhæfa ráðherra embættið og farið hefur fé betra.

LÁ