GÖSPUR GRÍMS & SIGURJÓNS

Flest höfum við gasprað og bassaleikari hljómsveitarinnar Grjóthruns (í Hólshreppi), Grímur Atlason, sannlega engin undantekning.  Gaspur Sigurjóns, fyrrverandi þingmanns Frjálslynda flokksins, Þórðarsonar yfir gaspri Gríms Atlasonar í Fréttablaðinu er þó með meiri gösprum.   Sakar Sigurjón bæjarsjórann (fyrir utan bassaleikinn gegnir Grímur stöðu bæjarstjóra í Bolungarvík) um rangfærslur og staðreyndaviðsnúning, gengur reyndar lengra og segir Grím vinna á móti sínu fólki.  Kannski í hundahaldsmálum en ekki varðandi kvótaandstöðuna sem er honum jafn sönn og Sigurjóni.  Í þeim málum eru þeir samflokksmenn og bendir Grímur á í grein sinni að atvinnuréttur sjávarbyggðanna sé algjörlega fyrir borð borinn með núverandi skipan veiðistjórnunar og kerfið sérsniðið að sérhagsmunum útvegsmanna.   Telji Sigurjón Grím fara með rangfærslur má benda á fjölda manns sem er honum sammála, þ.e. bæjarstjóranum.   Málflutningur frjálslyndra nær færri eyrum, meira að segja í sjávarbyggðunum, en málflutningur sjálfstæðismanna og kannski umhugsunarefni hvert skal sækja fylgið.  Að úthúða eina bæjarstjóranum á landinu sem þorir að greina frá tilvistarkreppu sjávarbyggðanna  og ekki undir rós er ómaklegt og óvænlegt til árangurs.  Sigurjón, hamraðu á hinum villuráfandi en ekki á skoðanabræðrum og systrum.

 LÁ

MANNDRÁP AF GÁLEYSI

Jón er hættur.  Arftaki Halldórs.  Slæmu gengi framsóknarflokksins er þó tæpast Jóni að kenna, þrotabúið var annarra sök.  Nýs formanns bíður ærið verk og mikið, uppgröftur, endurlífgun og partasaumur.  Líkja má hamförum flokksins við manndráp af gáleysi en eins og iðulega í pólitíkinni gengur morðinginn laus og púar á öruggum stað.   

LÁ

NÝR STJÓRNARSÁTTMÁLI

Nýr stjórnarsáttmáli er staðreynd.   Engir kollhnísar og orðalag allt fremur óafgerandi.   Í heilbrigðismálum er þó opnun á meiri fjölbreytileika rekstrarforma.  Hefði jafnhliða kosið lokun á hátæknisjúkrahúsið sem því miður er enn í kortunum.   Sjávarútvegurinn verður áfram einkamál útvegsmanna, landbúnaður ?   Endurskoðun lífeyrisréttinda þingmanna og ráðherrra kemur fagnandi og Langisjór sömuleiðis.   Annars er þessi sáttmáli eins og aðrar vinnuáætlanir, ásetningur og áform sem hægt er að riðla eftir aðstæðum hverju sinni. 

Óska komandi stjórn góðs gengis og velfarnaðar.

LÁ

ÓSÓMI Í KÍNA

Sá frétt í kvöld þar sem gestir, m.a. börn, skemmtu sér yfir áti tígrisdýra.  Bráðin var lifandi og henni sturtað úr greiðabíl að fólki ásjáandi.  Einnig gat fólk keypt fiðurfé og gefið kattardýrunum í ábæti.  Ofangreindur hrollur átti sér stað í kínverzkum dýragarði og ég sem farinn var að renna hýru auga til þessa lands verð nú að endurskoða afstöðu mína til evrópubandalagsins.   Að fótumtroða mannréttindi er illt en málleysingja dauði.   Vonandi tímir guð einni plágu eða svo á þennan ósóma. 

LÁ