PENDÚLLINN SVEIFLAST ÖFGA Á MILLI.

Ýkt samfélag á Íslandi felst t.d. í nafngiftum.  Afkáraleg nöfn, jafnvel afskræmd, tungubrjótar og raðheiti í ætt konungborinna hafa rutt sér til rúms.  Nefni ekkert og móðga engan.  Annað er sjúkrahúsheimsóknir.   Áður var heimsóknartími foreldra mjög takmarkaður og betra þótti að hafa þá fjarri, núna mega foreldrar vart fara heim og nýjustu barnadeildirnar byggðar að hætti hótela.  Algengt var að lík stóðu í heimahúsum fyrir greftrun, nú sjá fæstir lík fyrr en seint og síðar meir.  Stofugangur var í reykjarkófi á áttunda áratugnum, nú má ekki einu sinni púa á sjúkrahúslóðinni.   Súkkulaðistykki voru smáflísar hér áður en nú á stærð við mótatimbur.  Þegar Björgvin Halldórsson stóð á hátindi frægðarinnar vantaði í hann hálfa framtönn og skelltu margir hamri í góm til að apa það eftir.   Nú spanderar fólk vænni innborgun í íbúð  í tannréttingar jafnvel þó grísirnir séu margir.   Meira að segja bíómyndir hafa vaxið frá hefðbundinni 90 mín. skemmtan í 270 mín.  Fjársýsla er samt ýktasta dæmið og jafnframt það sorglegasta, sjómenn gerðust bankamenn, rifu í sig heiminn og loks sjálfa sig.   Og nú er núllstilling framundan, akstur frá óhófi til óhófs sem margir segja afturhvarf til fortíðar.  En ætli pendúll sögunnar hafi ekki ávallt sveiflast á milli öfga og skársti tíminn þegar hann er mitt á milli.

LÁ

HEILBRIGÐISGEIRINN KRUFINN.

Niðurskurðarsveðjan er nú komin á fullt og strax farið að snitta til velferðarpálmann.  Heilbrigðisgreinin sem verið hefur einna fyrirferðarmest verður nú að sjá á eftir þó nokkrum stilkum.   Nokkuð ljóst að nýtt hátæknisjúkrahús má þola bið og þjóðin hrósa happi að sú firra hafi ekki verið komin á legg.   Dellan sýnir þó ágætlega hverju innlögn eins ráðherra getur komið af stað.  Jafnvel hjá hámenntuðu fólki.  Launakostnaður í heilbrigðiskerfinu er lang stærsti útgjaldaliðurinn og á sjálftöku ráðandi hópa eins og lækna þarf að taka t.d. með launaþaki.  Einnig er lyfjakostnaður fáranlega hár og þyrfti að þrengja skorður til uppáskrifta á þann hátt að bununni sé beint að ódýrari lyfjum.   Í þriðja lagi mætti hemja rannsóknargleðina enda oft hægt að ná fram því sama með orðræðunni einni.   Í reynd hefði sparnaður í heilbrigðiskerfinu átt að eiga sér stað miklu fyrr en hingað til hafa tilraunir í þá átt verið púaðar niður af ráðandi fólki og hagsmunaaðilum.   Langt er síðan að læknisfræðin óx sjálfri sér yfir höfuð og gustukaverk að grisja þann vöndul.   Umönnunarstéttirnar liggja hinsvegar ver við höggi.  Fórnfýsi þeirra sem þar starfa er einstök og sé tekið mið af eðli vinnunar og framlagi mættu sumir hugsa sig um áður en þeir fara að fjargviðrast.

LÁ

TILRAUNAVERKEFNIÐ VESTFIRÐIR.

Þó stjórnmálamenn liggi almennt mjög undir ámælum geta jaðarbúar hér  vestra hrósað happi í samgöngumálum.  Þrátt fyrir efnahagslega ágjöf er Mjóafjarðarbrú staðreynd, Arnkötludalur á lokasprettinum og Bolungarvíkurgöng vart sniðgengin úr þessu.    Allar þessar úrbætur styrkja svæðið og taki menn eftirleikinn með trompi er aldrei að vita hvað gerist.  Mín tillaga í þeim efnum er að kjálkinn standi utan við ESB, AGS og þann gapastokk allan sem einskonar tilraunaverkefni.  Með því gæti þjóðin séð með eigin augum hvor leiðin falli betur að þjóðarhag og fólk ákveðið hvoru megin girðingar það vill búa.

LÁ  

MÚTUR STUDDAR LAGALEGUM RÖKUM.

Margur verður af aurum api fullyrðir máltækið og asni gengur á lofti sé hann klyfjaður gulli.  Talsmaður Landsvirkjunar segir lagaheimild fyrir greiðslum til sveitarfélaga óski utanaðkomandi aðili eftir áheyrn og ástæðuna aukið álag á sveitastjórnarmenn, stundum 200%.  Stjórnmálamenn í aðdraganda bankahrunsins hafa þá  væntanlega fengið vænar álagsfúlgur fyrir yfirvinnuna sem fylgdi þátttökunni í mærðardansinum.    Það er greinilega ekkert ólöglegt á Íslandi nema að fá sér í haus, bankarán, fjársvik, landráð, yfirhylming, mútur, allt látið viðgangast og stutt lagalegum rökum.  Þjóðin er enn án landsýnar og þarfnast sárlega nýs sjókorts.    

LÁ

HÖFUÐVÍGI VAGNANNA.

Í dag gekk aðlögun Lýðssonar að lífi og siðum dagheimilis Bolungarvíkurbæjar betur en greiðsluaðlögun heimilanna.  Snáðinn pípti hvorki né hváði og kærði sig kollóttan um viðbrögð hollendinga og breta við breyttri Ísbjörgu sem hann þarf þó að borga.  Knattspyrna vetrarins hófst svo með kvöldinu og var í alla staði ömurleg, þarf að fara svo langt sem í tímabil Gríms og aðmírálsins til að muna aðra eins hörmung.  Enda varð að lofta eftir útreiðina og lá leiðin í höfuðvígi Vagnanna þar sem yfirkerran veitti börnum sínum móðurlega forsjá og þurrkex.   Að vanda vísaði Vagnsson alþjóðasamfélaginu á bug og sagði opnun þess einmitt hafa hrundið yfir okkur þessari fjármálaógæfu, vildi loka Íslandi, læsa og fá að vera í friði.  Vagnsdóttir kvað þetta torfkofahugsun og sagðist vel geta hugsað sér sæti á evrópuþinginu við hlið Berlusconi.  Vagnsson minnti Vagnsdóttur á unglingaveiki ítalans og lítt dygði fyrir fullvaxta konu að sveifla pilsi í skiptum fyrir velvild.  Vagnsdóttir hló þá ísköldum hlátri og sagðist fullnuma í pólitískum pilsaþeytingi og vændi Vagnsson stillilega um getuleysi í þeim efnum.   Við þetta ærðist Vagnsson og hreytti út úr sér séríslenzku stöfunum í stafrófinu.  Vagnsdóttir tók þá hár úr hala sínum og sagði á esperantó vilja að sófaborðið yrði að svo stóru fjalli að Vagnsson kæmist aldrei yfir.   Þá rumdi í þeirri gömlu:   Mikið gat maður verið ungur og vitlaus....   

LÁ  

GRÍMSBRÚ & ELÍASARSLÓÐ.

Aðlögunin í forskólanum heldur áfram á morgun.  Gekk illa í dag, feðgarnir syfjaðir og illa stemmdir.  Sem sagt sneypuför.  Önnur tilraun verður gerð á morgun.  Annars hresstumst við báðir síðdegis og skruppum í kerrutúr um þorpið.  Var búið að fjarlægja nokkra skúra í sumar og járnbingjum fækkað til muna.  Einnig kominn fyrirtaks göngustígur meðfram bæjarlæknum en í bæjarstjóratíð Gríms endaði slóðinn við brúna þegar  bæjarsjóður tæmdist.  Brúna kalla ég Grímsbrú og gaf stígnum nafn í dag, Elíasarslóð.   Enda brúaði Grímur bilið svo sjallarnir gætu haldið áfram.  En hvort sem ruslahraukaplakatið frá í vor hafi ýtt við bæjaryfirvöldum eða ekki eiga þau hrós skilið fyrir tiltektina og fjarlægi þau steypubinginn framan við félagsheimilið fá þau fullt hús.

LÁ   

AUKASÝNINGAR Á GAMLA LASTABÆLINU.

Kanadíska orkufyrirtækið MAGMA sækir nú í eignahluti orkufyrirtækja á Íslandi.  Innspýting frá einkageiranum hefur oftar en ekki reynst vel þó umræðan nú sé eðlilega lituð af biturri reynslu óhófs og græðgi í þessum efnum.  En af því sem frést hefur af tilboði MAGMA virðist margt sammerkt með fyrrgreindu lastabæli.  Vextir afborgana eru lágir eða 3svar sinnum lægri en af icesavehörmunginni.  Einnig eru 2/3 hlutar kaupverðs ekki borgaðir fyrr en að 7 árum liðnum og veðið kaupin sjálf.  Verst er þó krafa kaupanda um samningsleynd.   Því leikhúsi héldu flestir búið að loka.  Samfylkingin kveðst þó ekki una þessu og fer fram á opinberun.  Þó því erindi verði hafnað heiti ég á samfylkingarmenn að birta samninginn og sýna þá viðleitni sem flokkurinn boðar.

LÁ

HAUSTTEIKN.

Í vestri er farið að hausta.  Fjöllin farin að bíða eftir kollhúfum vetrar.  Flugur afvelta í gluggum og mýs á útkikki eftir opnum hurðum.    Lýðsson er að fara í aðlögun á dagheimilinu og kemur í minn hlut.  Tónlistarskólinn settur á morgun og fréttatímarnir brátt blandaðir fúgum og sónötum.    Og hundurinn kominn með gigt.  Allt fastir liðir sem einkenna þennan djúpa en tregafulla árstíma.   Limirnir fá nú loksins hvíld að einum undanskildum sem eltir viðleitni hjartans.   Hinir láta líða úr sér.   Með kerti í glugga geng ég til hvílu og heyri ekki lengur í farfuglunum.   Konan er hinsvegar byrjuð að hrjóta sem er nýnæmi.

LÁ 

AFMÆLISVEIZLA Á FLATEYRI.

Heiðursmaðurinn Þórður Jónsson, fyrrum vagnstjóri á Flateyri, nálgast nú 100 árin og blés því í lúður í gærkvöld.  Hlýddu margir kallinu enda vel veitt og mikið í boði húsfreyju.   Í tilefni dags fékk Þórður íslending á fæti og ber því skylda til áframhalds næstu 10 árin eða svo.  Hélt afmælisbarnið þrumuræðu um þjóðmálin, kvaðst aldrei hafa verið á færi hins opinbera fyrir utan nótt eina í fangaklefa sem staðgengill.   Sagði Þórður þjóðina vera á tímamótum og reynslubolta eins og sig best fallna til réttra ákvarðanna.   Klikkti út með lofi um sína heittelskuðu og sagðist hlakka til að ganga næsta hundraði í mót.   Vagnstjórinn lengi lifi!

LÁ  

AFI EGILS SKALLA-GRÍMSSONAR Á ÞINGI.

Minna varð úr áminningu hæstvirts þingmanns en til stóð og sök varpað á Kveldúlf, afa Egils Skalla-Grímssonar, en sá ættleggur var þekktur fyrir hamskipti á síðkvöldum, ekki sízt væri öl kneyfað.  Líklega hefur hæstvirtur þingmaður bölið bætt með því að benda á eitthvað annað og hæstvirtum þingforseta ásamt háttvirtum málsækjanda því talið almennan farveg farsælli en sértækan.  Enda hverju skiptir smá Kveldúlfur þegar hæstvirtir þingmenn, jafnvel ráðherrar, geta áminningarlausir leynt þingheimi bæði skjölum og upplýsingum.   Ég ætla að muna það næst þegar frúin verður stöðvuð af löggunni að segja þetta bara smá Kveldúlf.

LÁ