ANDVAKA ÍSLENDINGAR.

Undarleg tilfinning grípur eflaust margan íslendinginn í kvöld.   Þ.e. þegar búið er að sinna makanum sé svoleiðis til staðar.  En myrkrið í kvöld er öðruvísi en myrkrið í gær.  Forvitnilegra.  Elskan mín sagði sér líða eins og fanga sem laus væri eftir áralanga afplánun.  "Ekki tala", sagði ég.  Ég vissi við hvað hún átti.   Glugginn sem óhugsandi var að opna er það ekki lengur.  Nýr andvari, nýr ilmur, sjávarniður í fjarzka.  Grjóthrun og afturgöngur sem legið hafa niðri rísa.   Sniðgengnir draumar rætast og fólk mun gráta af gleði.  Ekki endilega vegna þess sem koma skal heldur vegna oksins sem er farið.  Enginn veit hvað átt hefur fyrr en misst hefur og gildir spekin ekki síður um þrúgun.  Kannski drepst allt á dreif, kannski ljósið slokkni jafnharðan en upplifunin, þessi andvökustund margra íslendinga er dýrmætur sálargustur.   Megi Jóhanna vaxa af verkum sínum og hennar meðreiðarlið.

LÁ

HRINGINN Í KRINGUM JÖRÐINA Á 80 DÖGUM.

Skoðanakannanir sýna vinstri græna á  flugi og sveima gammarnir hátt yfir Valhöll.   Í darraðardansi sl. mánaða hafa margar hugmyndir um breytta stjórnskipan, nýja stjórnarskrá, jafnvel nýtt lýðveldi skotið upp kollinum.  Stjórnmálaflokkarnir hafa keppst við að grípa þær á lofti og sogið með því kraftinn úr nýjum framboðum.   Kannski verður gamla fjórflokkakerfið aldrei traustara en eftir vorkosningarnar?   Og kannski vinstri grænir verði enn og aftur í stjórnaraðstöðu að þeim loknum.   Hér er ekkert gefið, enn kýs fjórði hver íslendingur sjálfstæðisflokkinn og framsókn á bullandi siglingu.  5% aukning á hvorn og öll plön vinstri flokkanna riðlast.  Nema náttúrulega ríkisstjórn morgundagsins geri einhverjar rósir,  hún hefur álíka marga daga og Fogg hafði umhverfis jörðina. 

LÁ  

FYRSTA SKÓFLUSTUNGAN AÐ NÝJU SAMFÉLAGI.

Sé rétt að okkar bíði 2000 milljarðar til borgunar er eins gott að hörfa og marka okkur víglínu nógu aftarlega.   Með því vinnum við okkur dýrmætan tíma.   Forystumenn ýmissa fagfélaga og launþegasamtaka fara mikinn og  tala um brostnar forsendur kjarasamninga.  Svo sannarlega rétt en komandi launabarátta verður varnarbarátta og ekki bara um laun heldur líka vinnu.  Tryggingasjóður atvinnuleysisbóta stendur illa og gæti verið uppurinn um áramót.  Verðbólgan er tæp 20% og atvinnuleysið stefnir í sama far.  Hagræðingin í sjávarútvegi er komin til Pógóeyja en skuldir heimilanna eru hér.   Hver einasti íslendingur þarf að gíra sig niður og það sem gildir í dag gildir ekki á morgun.  Launalækkanir, skattahækkanir, niðurskurður velferðar, þetta er það sem við blasir .  Og því fyrr sem við einhendum okkur í verkið því fyrr komumst við á réttan kjöl.  En fyrst þarf að gera eitt.  Setja afturvirk lög á gömlu firringuna.  Að geta t.d. ekki losnað við ónýta seðlabankastjóra nema borga fyrir hundruði milljóna er ótækt.  Að forsvarsmenn þjóðarinnar sem ekki stóðu sína pligt fái mánaða biðlaun samhliða þingstörfum er ótækt.  Að æðsti maður fjármálaeftirlits með allt á hælunum sé leystur út með milljónum er ótækt.   Eftirlaunalögin alræmdu eru ótæk.   Ótrúlega margt er ótækt.  Því eigum við að setja afturvirk lög á þessar endaleysur allar, afnema öll sérréttindi  og samrýma starfs- og starfslokakjör allra opinberra starfsmanna.  Þjóðin er að vakna eftir vondan draum og fyrsta skóflustungan að nýju samfélagi þarf að vera djúp.   Það þýðir enga hálfvelgju og verði menn fúlir þá verður bara svo að vera.

LÁ   

HVALVEIÐISKOÐUN.

Umdeild ákvörðun fráfarandi sjávarútvegsráðherra hrellir marga.  Reyndar hefur fátt frá honum komið óhrellandi.   En ákvörðun hans varðandi hvalveiðar er röng þó hún sé rétt.  Vitanlega á að nýta auðlind sé hægt að selja hráefnið  samhliða því að vera  skynsamlegt út frá náttúruverndarsjónarmiðum.   Veiðitegundir hér við land eru ekki í útrýmingarhættu.    Einnig skil ég ekki hvers vegna veiði og hvalaskoðun geta ekki farið saman.    Ferðamannastraumurinn er vaxandi og ekki að sjá að slíkir velti hvalveiðimálum íslendinga mikið fyrir sér.  Það sem hinsvegar gjaldfellir þetta sporðakast ráðherrans eru vinnubrögðin, að nenna og vilja binda hendur eftirmanna sinna.   Því ber að hnekkja þessari ákvörðun þó ekki væri nema til annars en að taka hana aftur.

LÁ

FLOKKSGRÚPPÍUR.

Þjóð sem dýrkar landráðamenn er á villigötum.   Raðir gjörninga, andstæðir þjóðarhag, hafa dunið á landsmönnum umliðin ár.  Mafíulýðveldið Ísland át sig innan frá fellur nú með sjálfu sér.  Fræg teiknimynd eftir sögu George Orwell rekur snilldarlega álíka atburðarrás.    Að færa úr þjóðareigu fiskimiðin eru landráð.     Eftirlaunalög sniðin að tilteknum einstaklingi eru landráð.  Að brottrekstur opinberra embættismanna skuli kosta þjóðina hundruði milljóna eru landráð.  Að handstýra sölu ríkiseigna eru landráð.  Að vanvirða jafnræði þegnanna eru landráð.   Að  þrásitja í trássi við þjóðarhag eru landráð.    Að stefna heilli þjóð í gjaldþrot eru landráð.   Sorglegt að gjörningsmennirnir eru enn á stalli margra, dáðir og upp klappaðir.  Sumum dugar ekki neitt, enginn heiðarleiki, engin auðmýkt, engin sýn, bara að vera með í einhverju liði, fá klapp á bakið, augnatillit, símhringingu.  Skítt með nokkur landráð, ekkert er ókeypis.   Meira að segja hundar ná ekki sömu tryggð og flokksgrúppíur.   Þeir láta sig þó hverfa á fengitíma.

LÁ  

HENNAR TÍMI KOM.

Samfylkingin vann kapphlaupið um fyrsta kvenforsætisráðherrann.  Og ekki bara það heldur yfirlýst samkynhneigð líka.  Frábært í alla staði, held þetta auki tiltrú landans hinumegin landsteina.  Væntanlega er ætlunin að halda þessu stjórnarmynstri eftir maíkosningar að viðbættum framsóknarflokki.   Þau plön gætu þó riðlast með nýjum framboðum en sjálfstæðisflokkur má búast við sniðgöngu, sé hann ekki fyrir mér á pallborðinu.   Áherzlur komandi ríkisstjórnar hafa á sér vinstri slagsíðu og sumar hverjar verulegar.  Kemur svo sem ekki á óvart og mótmæli bráðum fyrrum ríkisstjórnarmeðlima hjárænuleg í ljósi reynslunnar.  Auðvitað er almenningur hrifinn af frystingu eigna auðmanna og aðkomu þeirra að bjarráðasjóði.  Líka skuldbreytingu heimila og mýkri gjaldþrotameðferð að ekki sé talað um fyrirhugaðar breytingar á heilbrigðiskerfinu sem skal endurskoða.    Allt væn og góð vinsældamál en árangur Jóhönnu og Co. verður metinn strax í maí.   Því segi ég:  Gefum ríkisstjórninni vinnufrið og þegjum þangað til.

LÁ      

"Í UPPHAFI SKAL ENDINN SKOÐA"

Boðorðin tíu, skilyrði samfylkingar til stjórnarsamstarfs, liggja nú fyrir.  Strax rekur maður auga í fyrsta skilyrðið sem er tryggð við AGS og vegferð hans.   Samkvæmt yfirlýsingum formanns vinstri grænna er það hnjótur.  Engu breytir þó hagfræðingur ríkisstjórnar kveði á um lítið svigrúm til breytinga, orð eru orð.    Boðorð númer tvö fer þó enn verr í maga, líka fyrir framsóknarflokkinn.   Þar stendur:

2. Gerðar verði breytingar á stjórnarskrá hvað varðar fullveldi og auðlindir þjóðar. Jafnframt verði lögð fram tillaga um stjórnlagaþing, sem verði kosið til samhliða þingkosningum.

Fyrstu málsgreininni er klárlega ætlað að virkja boðorð tíu sem er: 

10. Kosningar til Alþingis verði haldnar 30. maí 2009. Samhliða þingkosningum fari fram þjóðaratkvæðagreiðsla um hvort sækja eigi um aðild að Evrópusambandinu.”

Samþykki þjóðin aðildarviðræður að evrópusambandinu verður eitt helsta verkefni næstu ríkisstjórnar að halda utan um það ferli.   Tilslökunum varðandi fullveldi og auðlindir var hafnað á nýafstöðnu framsóknarþingi og afstaða vinstri grænna til evrópumála er kunn.   Að þessu ættu báðir flokkarnir að hyggja áðuren til stjórnarmyndunar kemur því teljast verður fábjánaháttur að samþykkja boðorð tvö til þess eins að leggjast með samfylkingu í 100 daga.   Þá hlýtur utanþingsstjórn að vera betri kostur.

LÁ

SKILNAÐUR DAGSINS.

Eftir langþráð stjórnarslit kasta hlutaðeigandi flokkar drullukökum hvor í annan og kenna ófarir við úthalds- og verkleysi.   Taugin er rofin og versta ríkisstjórn seinni tíma örend.   Ýmsir sem komu að málum viðurkenna mistök en leitun að þeim sem huga að nýjum starfsvettvangi.  Sjálfstæðisflokkurinn lofaði mjög einkaframtakið, frelsið og útrásina.  Taktu þátt, taktu áhættu eða haltu að þér höndum og vertu öruggur, valið er þitt.  Hluthafi eða ekki hluthafi, markaðurinn sér um sig.  En hvað gerðist?  Fólk skríður, flekklaust, hrekklaust, alsaklaust, allslaust, vitlaust og súrefnislaust undir 2000 þúsund milljarða skuldabagga sem aldrei átti að koma neinum við.   Og hugmyndafræðingarnir yppta bara öxlum, segjast ætla að vera duglegir og láta hendur standa fram úr ermum.   Endaskipti hluta verða vart meiri.   Ingibjörg kvað sjálfstæðismenn skorta auðmýkt.  Þessu andmælir enginn með viti og tæpast að nokkur sængi hjá flokknum í bráð.    Rekkjubrögð komandi stjórnar, hver sem hún verður, hljóta að verða tilþrifameiri en hinnar fráfarandi.   Hver veit nema kosningum verði frestað?  

LÁ

1sti. KVENFORSÆTISRÁÐHERRA LÝÐVELDISINS.

Viðskiptaráðherra farinn.  Staðreynd.  Fjármálaeftirlitið hreinsað.  Staðreynd.  Ríkisstjórnin á bláþræði.  Staðreynd.   Á morgun bætast við fleiri staðreyndir.   Bæ, bæ, ríkisstjórn er líkleg, önnur bæ, bæ Davíð og þriðja Ingibjörg í forsæti.  Sigurinn í kapphlaupinu um fyrsta kvenforsætisráðherra lýðveldisins félli  þá samfylkingarmegin.    Algerlega óásættanlegt fyrir metnaðarfullan flokk eins og sjálfstæðisflokkinn og líkur á stjórnarslitum því yfirgnæfandi.  En verði Ingibjörg forsætisráðherra hefur hún 100 daga nema loforð um maíkosningar verði dregið til baka.   Þá geta 730 bæst við. 

LÁ 

ÞRÁSETA.

Umsetursástand er nú við híbýli forsætisráðherra.  Líkast sitja sjálfstæðismenn þar slegnir með óaðgengileg skilyrði samstarfsflokksins á borðum.  Forsætisráðherra ýjar að ábyrgð og stjórnarkreppu en Ingibjörg vill skeika að sköpuðu.   Einleikur viðskiptaráðherra kom tvíeykinu á óvart og er kannski dæmigert fyrir vinnubrögð sitjandi ríkisstjórnar.  En hann er hættur og kveðst axla þannig ábyrgð.   Forstjóri FME kveður svo með 20 milljónir í bónus, væntanlega fyrir ¨vel unnin störf¨.   Kannki hann afsali sér þessari sporslu eins og viðskiptaráðherra sinni.  Hvort Björgvin framlengi sitt pólitíska líf með þessu útspili  skal ósagt en það er mín persónulega skoðun og hún bjargföst að fólkið sem ekki brást við boltanum eigi að leita hófanna utan vallar.  Nóg var nú samt.

LÁ