BURÐARBITUNUM FÆKKAR.

Hrós til sjónvarpsins að sýna beint frá fundi kvöldsins.   Mikill fjöldi og frummælendur allir góðir.   Ráðherrar sem mættu fá prik fyrir það en ekki frammistöðuna.  Hrokinn í sumum yfirgengilegur, skortur á kímnigáfu sameiginlegur flestum og sýnu verst formaður samfylkingar sem missti frá sér þjóðina í beinni.   Iðnaðarráðherra stóð sig best og virtist afslappaður innan um atkvæðin.   Hann ætti þó að búa sig undir útburð eins og hinir því burðarbitunum fækkar og megna brátt ekki að halda þessari ömurlegustu leikmynd lýðveldisins uppi.   

LÁ       

IQ

Egill Helgason fékk á dögunum viðurkenningu fyrir sitt Silfur enda þátturinn alllengi trónað á toppi þjóðmálaumræðu á Íslandi.   Svo var einnig í dag og óstaðfestur grunur margra fékk byr undir báða.   Á þar við þann leynihjúp sem umlykur bankahrunið og eftirmála þess.   Sá kvittur berst nú út að rúllettan sé hafin á ný, sömu fjárglæframenn, sömu bankastjórnendur.  Vinnuveitandi þeirra síðarnefndu að vísu annar, hið opinbera, en það virðist engu breyta og ríkisstjórnin endurtekur fyrri mistök, að aðhafast ekkert og upplýsa ekkert.   Erfitt er að finna skýringu á athæfinu, sú eina sem upp kemur að valdamenn eða stjórnmálaflokkar séu beint eða óbeint  þátttakendur.   Margt hefur orkað tvímælis í öllu þessu einkavæðingar- og útrásarferli, sumt frá í árdaga, annað á síðustu dögum.   Tilhögun stjórnvalda á uppgjöri bankanna er svo arfavitlaus að greindarvísitalan ein og sér dugir ekki til útskýringar.    

LÁ

ÚTBURÐUR RÁÐAMANNA?

Mörgum þykir nóg um hamaganginn við lögreglustöðina í dag.  Kastaðist í kekki vegna ófrelsis eins mótmælandans.   Auðvitað eru óspektir aldrei til eftirbreytni en hvað á fólk að gera?   Reiðin kraumar í þjóðfélaginu og hratt flæðir undan ráðamönnum.  Þeir, greyin, eru óvanir svona, hafa alltaf komist upp með svínaríið.   En þegar strákgrey er hnepptur í varðhald fyrir litlar sakir meðan ráðamenn, embættismenn og athafnamenn  sem velt hafa heilli þjóð um koll spranga um lausir og hafa ekki einu sinni vit á að koma sér í burtu, þá væri nú harla skaplaus þjóð sem ekket aðhefðist.   Á Austurvelli hélt laganemi snarpa ræðu og hótaði útburði stjórnenda úr opinberum byggingum verði þeir ekki farnir af sjálfsdáðum innan viku.    Kannski verða ráðherrar hnepptir í bönd og sendir til Timbúktu eins og Hannibal til Bolungarvíkur hérna um árið.   Stríð er í uppsiglingu á milli ríkisstjórnar  og almennings.   Hvort takist að svæla út ófögnuðinn kemur í ljós en vopnahlé er auðtryggt, einfaldlega með yfirlýsingu um kosningar í vor.

LÁ

Á ÞURRUM SKÓM.

Nýleg uppáhelling þeirra lægst settu missti marks og hrjáðustu þjóðfélagsþegnarnir áfram illa settir.  Í hnotskurn vandanum frestað og öll framkvæmd óljós og hálfkæringsleg.  Í dag poppuðu skötuhjúin svo upp með bragarbót eftirlaunalaga.  Forkólfur alþýðusambandsins gaf frat í þessa viðleitni og sagði hana viðhalda gjánni á milli lagahöfunda og almennings.    Samhliða þessu deila stjórnarliðar um nauðsyn kosninga.   Sú skoðun er þó enn ríkjandi að þeir sem skítinn skópu skulu hreinsa hann upp.   Spurningin er hvort  tilburðir valdhafa séu til komnir vegna réttlætiskenndar eða eingöngu yfirskyn hornreka fólks sem vill komast úr sjálfheldunni á þurrum skóm?      Mótmæli morgundagsins munu gefa vísbendingar um afstöðu almennings og ekki kæmi á óvart þó enn fjölgi á Austurvelli. 

LÁ  

SÓLIN SEST Í AUSTRI.

Kollvörpun íslenzks þjóðfélags er staðreynd.  Ríkust ei lengur, keikust ei lengur, undrabörn ei lengur.  Á naktri blágrýtisklöpp við hímum.   Erum afturreka en með hvað? 

Lífsstíll: Hús og bíll, húsbíll, sumarhús,   Kína, B&O,  hugoboss, Kjarval, Gilzenegger, spa, sjóvává. 

Stjórnkerfi:  Valdníðsla, hagsmunagæsla, leynimakk, sjálftaka, gullstólar, óreiða, bruðl, svik, prettir, spilling.

Samfélag: Landsbankadeildin,Glitnisrall,Kaupþingsmaraþon.               

Ímynd:  Viðskiptaundrið mikla.Gildi:  Veraldleg.Vís maður sagði þjáninguna fæðingarhríð skilningsins.  Í hringekju mannkynssögunnar eru mót réttsælis og andsælis mest spennandi andartökin.  Í þeim sest sólin í austri. Í þeim eru eftirlaunalög bætt.  Í þeim er blossi vonar. LÁ     

BREIÐFYLKING Í UPPSIGLINGU?

Sex vikur eru liðnar frá þjóðarskellinum.  Blórabögglinum kastað á milli ríkisstjórnar, seðlabanka og fjármálaeftirlitsins.    Andvaraleysið gagnvart útrásinni hefur verið ótrúlega útbreitt og gegnsýrt bæði stjórnmálamenn og kerfi.   Uppstokkun á hvorutveggja er óumflýjanleg.   Eggjakast er ágætt og ekki sýti ég þó eitt falli á Björn og annað á Össur en betur má ef duga skal.  Breiðfylking fólks sem hafnar ríkjandi spillingu og sofandahætti er í uppsiglingu og nái hún markmiði sínu skipta álit Ingibjargar og Geirs, Árna og Össurar engu máli.   Á þeim degi verður hægt að draga fánann að húni, ekki fyrr.

LÁ

BREIÐFYLKING Í UPPSIGLINGU?

Sex vikur eru liðnar frá þjóðarskellinum.  Blórabögglinum kastað á milli ríkisstjórnar, seðlabanka og fjármálaeftirlitsins.    Andvaraleysið gagnvart útrásinni hefur verið ótrúlega útbreitt og gegnsýrt bæði stjórnmálamenn og kerfi.   Uppstokkun á hvorutveggja er óumflýjanleg.   Eggjakast er ágætt og ekki sýti ég þó eitt falli á Björn og annað á Össur en betur má ef duga skal.  Breiðfylking fólks sem hafnar ríkjandi spillingu og sofandahætti er í uppsiglingu og nái hún markmiði sínu skipta álit Ingibjargar og Geirs, Árna og Össurar engu máli.   Á þeim degi verður hægt að draga fánann að húni, ekki fyrr.

LÁ

MÓTSAGNIR.

IMF veitir lán í óláni.  Núna Íslandi.  Fróðir segja skuldabyrðina ríflega 100% af þjóðarframleiðslu.   Vextirnir einir samsama árlegum kostnaði menntakerfisins og vextir viðbótarlánanna heilbrigðiskerfinu.  Reglur ESB kveða á um að skilyrði viðtöku þjóðar sé skuldsetning að hámarki 60% af þjóðarframleiðslu.   Samt heyrast hér raddir um inngöngu ESB innan árs.   Á meðan valdstjórnin dýfir landinu sem henni var treyst fyrir niður í ill- eða óviðráðanlegt skuldafen, treystir á samanskroppnar eigur bankanna, gefur frá sér dómstólaleiðina og lýtur í einu og öllu í lægra haldi fyrir valdablokk evrópska efnahagsbandalagsins, æpa ráðamenn á þessum óraunhæfu nótum.  Evrópuumræðan verður ekki umflúin en hana þarf að taka án offors.  Áköfum fylgismönnum er ekki treystandi, áköfum andstæðingum ei heldur.     Enda aðildarviðræður eitt en túlkun annað.   Að útiloka ESB athugunarlaust er óráð, að ætla okkur inngöngu sömuleiðis.   Í þessu er afslappað viðhorf heilladrýgst.

LÁ    

HRÓKUR ALLS FAGNAÐAR.

Á einni viku hafa tveir á topp 10 lista alþingis horfið.  Átt er við lund.  Þingheimur stendur rýrari eftir nema afleysingakellurnar komi á óvart.    Fráfarandi formanni auðnaðist ekki ætlunarverk sitt og held ég að hlutleysi hans gagnvart framboði Jóns Sigurðssonar á sínum tíma hafi hamlað flugi.   Guðna óska ég velfarnaðar og votta framsóknarflokknum samúð, hrókur alls fagnaðar er farinn.  

LÁ

KENNITALAN ÍSLAND 170644.

Mótmælaalda gengur yfir höfuðborgina og reyndar víðar.  En hverju er verið að mótmæla?   Í sex vikur hafa umtalsvert margar prósentur íslendinga komið saman á helgasta reit lýðræðisins og krafist afsagnar toppfígúra.  Þær treysta sínum dyggasta bandamanni fyrir útflæðinu, tímanum.  En eins og tunglið togar í hafið hafa þessar samkomur líka sinn togkraft.  Mótsögnin er að það er einmitt valdstjórnin sjálf.Æðstustrumparnir héldu blaðamannafund í vikunni.  Kynntu neyðaraðgerðir fyrir þá verst stöddu.  Ágætt framtak en hjarta almúgans sló annan takt sem endurspeglaðist í spurningum fjölmiðlafólksins.  Af þeim beindist aðeins ein að þessum aðgerðum. Hvorugur þessara stjórnmálaforingja hefur staðið undir væntingum, hvorugur vill meðtaka þá staðreynd og hvorugt andlitið tilheyrir framtíðarsýn þjóðarinnar.  Engu að síður er marvaðinn troðinn.  Sjálfstæðismenn lýsa sig viljuga að breyta kúrsinum varðandi evrópumálin og segja sjálfir vegna breyttra aðstæðna.  Vegna eigin óstjórnar segi ég.  Hugmyndafræðilega hefur flokkurinn gjörsamlega tapað sinni tiltrú og leitast við að bæta ímyndina með skrumi.  Samfylkingin tók við kefli framsóknar en endurbæturnar sem áttu að fylgja þessu tiltölulega unga, en fjölmenna stjórnmálaafli komu aldrei.  Í oddaflugi stjórnmálanna flaug þessi skari aftast og áreynslulaust.  Svo gala samfylkingar að evrópa hafi verið málið, fjarvera okkar í þeim gleðskap olli þessum harða skelli.  Vegna eigin óstjórnar segi ég. Augljóst er á viðbrögðum að stjórnarflokkunum hugnast að sitja áfram.  Annar vill forðast fylgishrun, hinn skil ég ekki.  Báðir hunsa ábyrgð sína á þjóðarskömminni og bjóða áfram sömu andlit, sömu gildi, sömu hugsun.  Engin viðleitni nema sú sem tryggir þau sjálf í sessi.  Í þessu fólki endurspeglast ekki bara efnahagshrunið heldur líka siðferðisbresturinn sem að baki liggur.  Drottin gaf og Drottin tók, þetta fólk bara tekur og tekur og vill halda áfram að taka.   Þessu er verið að mótmæla.      Austurvöllur er vagga lýðræðisins.  Þar stendur húsið sem hýsa á þá hugsun.  Hana er hinsvegar búið að útreka og því er verið að mótmæla.  Mótmælin eru krafa um virðingu við þær hugsjónir sem kennitalan Ísland 170644, lagði upp með.   Margir hafa lagt orð í belg, ný andlit með ólíkan bakgrunn, fjölbreytta sýn og úrræði.  Þennan rekavið vil ég inn í alþingishúsið og út með þann gamla.  LÁ